Akordu Haforsa Mobilidade Traballadór ba Plataforma Bayu Undan
Governu Konstitusionál IX, iha loron 31 fulan-janeiru tinan 2025, asiste asinatura akordu ida entre petrolífera Santos Limited ho Webstar-GAP Aviation, ho objetivu atu garante mobilidade traballadores ba plataforma Bayu Undan. Serimónia ne’e partisipa husi Ministru Petróleu no Rekursus Minerais no Ministru Komérsiu no Indústria Timor-Leste no Ministru Investimentu, Komérsiu no Indústria Malázia, Tengku Datuk Seri Utama Zafrul Abdul Aziz, nune’e mós funsionáriu sira husi Timor GAP no Autoridade Nasionál Petróleu nian, entre reprezentante sira seluk hosi entidade oioin. 
Tuir akordu ne’ebé asina hosi Vise-Prezidente Ezekutivu Santos nian ba Austrália Norte no Oeste no mós Timor-Leste, Vince Santostefano, no hosi Diretór Aviasaun Webstar-GAP nian, Syed Muhamad Azi Azman, sei fornese elikópteru rua hodi transporta traballadór sira ba plataforma petrolíferu.
Webstar-GAP Aviation maka subsidiáriu ida hosi TIMOR-GAP, E.P., ne’ebé kaer partisipasaun 45%, iha parseria ho Webstar Aviation Service, subsidiáriu ida hosi Grupu Webstar Malázia, espesializa iha servisus elikópterus ba indústria petróleu no gás. 
Prezidente TIMOR GAP, EP, Rui Soares, deskreve akordu ne’e hanesan istóriku, hodi subliña ninia impaktu pozitivu iha indústria petrolífera ninia papél hodi garante partisipasaun ativa hosi profisionais timoroan sira iha setór aviasaun ne.
Ministru Investimentu, Komérsiu no Indústria Malázia nian, Tengku Zafrul Aziz, destaka importánsia hosi akordu ida-ne’e hodi promove kooperasaun ekonómika entre Timor-Leste, Malázia no Austrália no salienta mós katak poténsia ba kolaborasaun ida boot liu entre Timor-Leste no Malázia iha setór mina no gás, no hametin parserias setór privadu entre nasaun rua ne’e. 
Ministru Petróleu no Rekursus Minerais, Francisco da Costa Monteiro, destaka mós importánsia hosi parseria entre Santos ho Webstar-GAP Aviation ba kreximentu setór petrolíferu no hametin kolaborasaun entre Timor-Leste no Malázia, tuir kedas ho apoiu Malázia ba Timor-Leste nia adezaun iha ASEAN.
Webstar-GAP Aviation sei estabelese ninia baze operasionál iha Kovalima, haree ba viabilidade komersiál no efisiénsia lojístika hosi fatin refere. Empreza estatál ne'e otimista kona-ba ninia kapasida atu garante enjeñaria profisionál, pilotu no apoiu lojístiku, ho objetivu atu jere filiál ne’e ho forma independente iha tinan lima oinmai. 
Daudaun ne’e, Webstar-GAP Aviation halo operasaun ho ekipamentu no rekursus kualifikadus Webstar nian, inklui profisionais timoroan barak ne’ebé antes ne’e servisu iha empreza ne’e, ne’ebé hala’o ona operasaun iha Timor-Leste durante dékada rua resin. Empreza ne’e iha kompromisu atu transfere responsabilidades ba profisionál timoroan sira tuir faze, ho sira balu hetan ona formasaun espesializada iha setór aviasaun nian. 
