Sorumutu Despedida entre Ministru Agio Pereira ho Reprezentante Espesiál Austrália ba Greater Sunrise
Ministru Prezidénsia Konsellu Ministrus no Interlokutór Timor-Leste nian ba diskusaun kona-ba Greater Sunrise, Agio Pereira, ohin, loron 29 fulan-janeiru tinan 2025, liuhosi video konferénsia, hasoru-malu ho Steve Bracks AC, iha sorumutu despedida ida ne’ebé marka ho termina ninia mandatu hanesan Reprezentante Espesiál Austrália ba projetu Greater Sunrise.
Enkontru ne'e hanesan oportunidade ida atu hatudu progresu ne'ebé alkansa ona durante Steve Bracks nia mandatu, rekoñese nia kontribuisaun sira no diskute perspetiva futuru ba dezenvolvimentu projetu Greater Sunrise nian. 
Durante enkontru ne’e, Ministru Agio Pereira destaka papel importante ne’ebé halo husi Steve Bracks durante prosesu tomak, liuliu iha promosaun konseitu Fundu Infraestruturas ba dezenvolvimentu projetu, ne’ebé kapitaliza hosi parte ida hosi parte Austrália nian, hosi reseita sira futuru projetu Greater Sunrise nian. Nia mós rekoñese esforsu Bracks nian hodi hametin kooperasaun entre nasaun rua ne’e, ne'ebé kontribui ba konfiansa no otimizmu ne'ebé boot liu kona-ba futuru projetu ne’e nian.
Ministru Pereira hato’o gratidaun ba dedikasaun Steve Bracks nian iha tinan hirak liubá, hodi subliña importánsia kooperasaun kontinuidade entre nasaun rua ne’e hodi garante progresu sustentável no iha benefísiu ba malu hosi projetu Greater Sunrise.
Enkontru ne’e mós permite troka ideias kona-ba pasu sira tuirmai husi projetu ne’e, inklui perspetiva Timor-Leste nian, estratejias hodi aborda rezultadus hudi relatóriu empreza britániku Wood nian no define pontu kontaktu foun sira hodi garante koordenasaun efetivu entre Governu Timor Leste no Australia.
Estudu ne'e hala’o hosi Wood, husi fulan-abríl to’o fulan-novembru tinan 2024, konfirma katak opsaun dezenvolvimentu projetu iha Timor-Leste ne’e viável no oferese benefísiu ekonómiku no sosial ne'ebé signifikativu ba nasaun ne’e.
Governu Timor-Leste reafirma ninia kompromisu ho dezenvolvimentu Greater Sunrise nu’udar prioridade estratéjiku ida hodi promove kreximentu ekonómiku no moris-di’ak povu timoroan nian, mantein kolaborasaun ida ne’ebé metin ho ninia parseiru internasionál sira.
Kampu gás Greater Sunrise lokaliza besik 140 km iha súl husi tasi-ibun Timor-Leste nian. Konsórsiu ne’e responsável ba dezenvolvimentu kampu sira (Sunrise Joint Venture) ne’ebé kompostu hosi TIMOR GAP, ho partisipasaun 56,6%, Woodside, ho 33,44%, no Osaka Gas Australia, ho 10%.
