Governu Timor-Leste

Alberto Xavier Pereira Carlos simu pose hosi Prezidente Repúblika, iha loron 22 Outubru, hodi sai nu’udar Vise-Ministru Negósiu Estranjeiru. Serimónia ne’e hala’o iha Palásiu Prezidente Nicolau Lobato, iha Díli, iha prezensa membru Governu nian sira hotu.

Iha serimónia simu pose ne’e, Alberto Carlos dehan: “Onra boot ida mai ha’u simu pose nu’udar Vise-Ministru Negósiu Estranjeiru, hanesan prova konfiansa Governu Konstitusionál ba da-IV, atu ha’u, maske  iha limitasaun, bele kontribui ho buat ruma ba nasaun ida ne’e, ne’ebé ha’u hetan priviléjiu hodi sai hanesan oan no sidadaun ida”.

Alberto Carlos, hori fulan Maiu tinan ida ne’e, kaer hela xefia iha Eskritóriu Nasionál Altu Komisariadu Nasoens Unidas nian ba Refujiadu (AKNUR) iha Timor-Leste, kargu ne’e nia kaer molok nia sai ba Sudaun, iha 2008, hodi servisu ba AKNUR hodi dezempeña ninia funsaun hanesan Ofisiál Kampu nian. Iha tinan 2005, Vise-Ministru Negósiu Estranjeiru ne’e, liu ona hosi Sudaun, hanesan Ofisiál protesaun ba Operasaun Emerjénsia nian, hodi serbisu ba AKNUR, ne’ebé mak nia hahú servisu ona iha tinan 1999.

Lisensiadu iha Siénsia Ensinu no Edukasaun nian, Alberto Carlos, partisipa iha Operasaun emergénsia, iha Timor-Leste, iha 2006 no iha 1999 (Repatriamentu Voluntáriu, Protesaun ba ema sira hakarak fila mai sira nia rain no Integrasaun Lokál). Nia mós sai Instrutór Lei Internasionál Refujiadu nian, no Instrutór Óspede Azilu no Direitu Umanu ba Akademia Polísia PNTL nian.