Governu Timor-Leste

Primeiru-Ministru, Kay Rala Xanana Gusmão, ohin, loron 28 fulan-janeiru tinan 2025, iha Palásiu Governu, hala’o sorumutu ho Ministru Asuntus Internus Austrália nian, ne’ebé ka’er mós pasta Imigrasaun no Asuntus Multikulturais, Siberseguransa no Artes, Tony Burke MP. 

Sorumutu ne’e marka prezensa hosi Ministru Prezidénsia Konsellu Ministrus no Interlokutór Timor-Leste iha diskusaun Greater Sunrise, Agio Pereira, Ministru Negósius Estranjeirus no Kooperasaun, Bendito dos Santos Freitas, Ministru Interiór, Francisco da Costa Guterres, Embaixadora Timor-Leste iha Austrália, Inês Almeida, no Embaixadóra Austrália iha Timor-Leste, Caitlin Wilson. 

Durante enkontru ne’e, Tony Burke subliña kompromisu Austrália nian atu serbisu hamutuk ho Timor-Leste hodi rezolve dezafiu rejionál sira ne’ebé partilla. “Austrália komprometidu atu serbisu hamutuk ho Timor-Leste hodi rezolve dezafiu komún sira, hanesan migrasaun irregulár, inklui kontrabandu no tráfiku ema, jestaun fronteira no siberseguransa,” nia hateten. 

Ministru Austrália ne’e destaka liután katak “Timor-oan liu 9.500 mak hela iha Austrália no ami apresia sira-nia kontribuisaun ba ami-nia rain. Ami-nia lasu interpesoál ho Timor-Leste hatudu forsa hosi relasaun bilaterál no potensiál ne’ebé eziste hodi habelar kooperasaun iha futuru.”

Tony Burke reafirma mós apoiu hosi Governu Austrália ba dezenvolvimentu sustentável Timor-Leste nian, hodi destaka interese komún sira hodi promove rejiaun ida ne'ebé pasífiku, estavel no prósperu. 

Iha loron ida antes, Tony Burke mós hala’o sorumutu ho Ministru Juventude, Desportu, Arte no Kultura, Nelyo Isaac Sarmento, no Sekretáriu Estadu Arte no Kultura, Jorge Soares Cristovão. Hamutuk, sira vizita espozisaun “Jarracharra – Vento da Estação Seca”, ne’ebé aprezenta iha Fundasaun Oriente, hatudu kolesaun arte textil ne’ebé kria husi feto indíjena sira husi Babarra Women’s Centre, iha Territóriu Norte Austrália. Men’s Centre, iha Territóriu Norte Austrália nian.