Governu Timor-Leste

Vise-Ministra ba Asuntus ASEAN, Milena Rangel, nu’udar líder ba Delegasaun Funsionárius Altu Timor-Leste nian, partisipa iha sorumutu Funsionárius Altu ASEAN,  (ASEAN Senior Officials’ Meeting - SOM), ne’ebé prezide hosi Sri Amran Mohamed Zin, Sekretáriu-Jerál Ministériu Negósiu Estranjeirus Malázia no Sekretáriu Permanente no Líder SOM Malázia nian. Sorumutu ne’e hala’o iha loron 18 fulan-janeiru tinan 2025, iha Langkawi International Convention Centre, iha Langkawi, Malázia. 

Ida ne’e maka sorumutu dahuluk husi funsionárius altu ne’ebé hala’o iha Malázia ninian prezidénsia iha ASEAN, iha tinan 2025. Iha enkontru ne’e, diskute temas prioritárius, inklui metas no inisiativas Prezidénsia malaia nian, relasoins esternas ASEAN no implementasaun Roteiru ba Adezaun Plena Timor -Leste ba organizasaun ne’e. 

Iha ninia intervensaun, Vise-Ministra Milena Rangel fó parabéns ba Malázia tanba ninia prezidénsia no hato’o apoiu tomak hosi Timor-Leste ba objetivu sira ne’ebé trasa ona. Hato'o mós ninia rekoñesimentu ba apoiu kontínuu hosi Estadus-Membrus ASEAN iha implementasaun Roteteiru ba Adezaun Plena Timor-Leste, no destaka progresu sira ne'ebé atinje ona to'o ohin loron. Nia reafirma kompromisu Timor-Leste nian atu adere ba instrumentus jurídikus ASEAN, hanesan parte ida hosi prioridade dahuluk Roteiru nian, no hato'o espetativa atu kontinua sura ho orientasaun hosi ASEAN iha etapa sira tuirmai hosi prosesu ne'e. 

Iha kalan molok enkontru, iha loron 17 fulan-janeiru tinan 2025, Vise-Ministra ne’e partisipa han-kalan Boazvindas nian ne’ebé oferese hosi Sri Amran Mohamed Zin iha Breeze Lounge, iha The Westin Langkawi. Eventu ne’e oferese ambiente informál ida atu troka ideias no hametin relasoins entre lideres SOM ASEAN nian