Ministru Prezidénsia Konsellu Ministrus Asume Tutela Servisu Nasionál Intelijénsia
Primeiru-Ministru, Kay Rala Xanana Gusmão, delega formalmente ninia kompeténsia kona-ba Servisu Nasionál Intelijénsia (SNI) ba Ministru Prezidénsia Konsellu Ministrus, Agio Pereira, liuhosi Despaxu n. 01/PM/1/2025, ne’ebé publika iha loron 20 fulan-janeiru tinan 2025. 
Despaxu ne’e hateten katak desizaun ida-ne’e konsidera “importánsia atu asegura tutela ida ne’ebé efetiva iha akompañamentu Servisu Nasionál Intelijénsia nian iha ninia misaun importante atu prodús informasaun ne’ebé kontribui hodi salvaguarda independénsia no interese nasionál, seguransa interna no esterna, no prevensaun terrorizmu, espionajen no krime organizadu”.
“Imediatamente reforma no reestrutura Servisu Nasionál Intelijénsia, hodi garante integridade no profisionalizmu iha instituisaun ida-ne’e”, hanesan kompromisu ida ne’ebé hato’o hosi Primeiru-Ministru, Kay Rala Xanana Gusmão, iha ninia diskursu iha loron 01 fulan-jullu tinan 2023, iha tomada posse Governu Konstitusionál IX. Atu kumpre kompromisu ida-ne'e, iha loron 5 fulan-setembru tinan 2023, Ministru Agio Pereira, reprezenta Primeiru-Ministru, fó pose ba Longuinhos Rabindranath Tagore Domingues de Castro Monteiro no Egas de Araújo Moniz, ida-idak nu'udar Diretór-Jerál no Diretór-Jerál Adjuntu, Servisu Nasionál Intelijénsia nian. 
Iha serimónia fó pose ba lideransa foun SNI nian, Ministru Agio Pereira subliña katak “intelijénsia, hanesan servisu Estadu ida ne’ebé sensivel tebes, la’ós siénsia ezata ida , maibé arte ida ne’ebé ninia evolusaun presiza dixiplina, kriatividade no inovasaun barak”. 
