Governu Timor-Leste

Vise-Primeiru-Ministru no Ministru Koordenadór ba Asuntu Ekonómiku, Francisco Kalbuadi Lay, akompaña husi Ministru Transporte no Komunikasaun, Miguel Marques Gonçalves Manetelu, iha loron 10 fulan Janeiru tinan 2025 hala’o lansamentu ofisiál ba rezultadu estudu viabilidade sistema transporte públiku nasionál. Inisiativa Governu Timor-Leste nian ida ne’e dezenvolve iha kolaborasaun ho Banku Dezenvolvimentu Aziátiku (ADB-sigla iha lian inglés). Eventu ne’e hala’o iha Hotel Novo Turismo no hetan partisipasaun hosi entidade governamentál balu no parseiru internasionál sira. 

Iha ninia diskursu, Vise-Primeiru-Ministru destaka importánsia hosi projetu ne’e ba dezenvolvimentu ekonómiku no sosiál país nian, no subliña kompromisu Governu nian hodi hadi’a mobilidade no inkluzaun sosiál liuhosi sistema transporte públiku ne’ebé modernu no efisiente. “Iha tinan 2024, ami lansa Planu Diretór ba Transporte Públiku, no ohin, iha inísiu tinan 2025, ami sente kontente atu aprezenta rezultadu estudu viabilidade ne'ebé konfirma viabilidade projetu nian atu la'o ba oin. Ida ne’e hanesan marku importante ida ba futuru transporte iha Timor-Leste,” afirma Francisco Kalbuadi Lay. 

Ministru Transporte no Komunikasaun, Miguel Manetelu, reforsa katak, setór transporte ne’e fundamentál atu alkansa objetivu sira ne’ebé define ona iha Planu Estratéjiku Dezenvolvimentu Nasionál 2011-2030. “Projetu ne’e la’ós de’it atu moderniza infraestrutura, maibé sei kontribui mós ba inkluzaun sosiál no kreximentu ekonómiku. Ami sei servisu nafatin atu transporte públiku iha Timor-Leste bele hetan asesu, atrativu no inkluzivu,” nia destaka.

Durante eventu ne’e, Arun Ramamurthy, lider ekipa projetu ADB, aprezenta rezultadu prinsipál husi estudu viabilidade, ne’ebé analiza fatin prioridade sanulu, inklui Dili, Baukau, Maliana, Lospalos, Suai no Viqueque. Estudu ne'e konklui katak sistema ne'e téknikamente, ekonomikamente no ambientalmente viável. Benefísiu sira ne'ebé hein maka sei kria reseita liuhosi taxa terminál, billete no publisidade, no mós impaktu pozitivu sira iha redusaun emisaun karbonu no hadi'a populasaun nia kualidade moris. 

Diretora Rezidente ADB iha Timor-Leste, Stefania Dina, elojia Governu nia esforsu sira hodi promove rede transporte ida ne’ebé forte no interligadu liu, hodi destaka katak “mobilidade asesivel ne’e esensiál atu haburas dezenvolvimentu sosioekonómiku no garante oportunidade hanesan ba sidadaun hotu-hotu ”.

Dadus resente sira hosi Diresaun Nasional Transporte Terrestre (DNTT) hatudu katak, iha tinan 2024, rejista ona karreta foun hamutuk besik rihun 11 no motorizada besik rihun 25 maka rejista ona iha Timor-Leste, aumentu ida ne'ebé hatudu nesesidade urjente hodi hadi'a infraestruturas ho servisu sira transporte nian. Estudu viabilidade ida-ne'e hanesan pasu importante ida hodi hasoru dezafiu sira hosi setór no implementa solusaun sira ne'ebé maka garante konfortu, seguransa no efisiénsia ba utente sira. 

Lansamentu ne’e hetan mós partisipasaun hosi reprezentantes entidade governu nian balu no organizasaun parseira sira, inklui KOICA, PNTL no Embaixada Austrália.