Primeiru-Ministru Xanana Gusmão hetan omenajen ho Prémiu Fundadór hosi Prémiu Pás Sunhak 2025
Primeiru-Ministru Kay Rala Xanana Gusmão hetan omenajen iha loron kuarta, 15 fulan-janeiru 2025, ho Founder’s Award of the 2025, rekoñesimentu internasionál ida “ba ninia kontribuisaun sira independénsia Timor-Leste nian, rekonstrusaun nasionál no kooperasaun internasionál”. Serimónia entrega prémiu ne’e marka ona ba fulan-abríl 2025, iha Koreia Súl.
Durante konferénsia imprensa ne'ebé fó sai manán-na'in sira prémiu nian, Yeon Ah Moon, hodi fundadór prémiu nia naran, Dra. Hak Ja Han Moon, destaka katak "Prémiu Dame Sunhak nian la hatene kolen buka pilár sira respeitu ba direitus umanus, promove rekonsiliasaun no prezervasaun ba ambiente. Ohin, ita selebra ema sira ne'ebé dedika sira-nia moris hodi rezolve dezafiu globál no ne'ebé sei kontinua atu fó naroman ba valór universál dame nian ne'ebé umanidade luta ba.” 
Prezidente Komité Prémiu nian, José Manuel Durão Barroso, destaka mós katak “Prémiu Dame Sunhak 2025 selebra lider vizionáriu sira ne’ebé transforma ona ideál sira dame nian sai solusaun konkreta no sustentável, ho aten-barani hasoru dezafiu globál sira no lidera mudansa transformadora.”
Deskreve ona Kay Rala Xanana Gusmão nu’udar “lider ida ne’ebé simboliza independénsia no demokrasia Timor-Leste nian”. “Gusmão sai nu’udar prezidente dahuluk nasaun nian iha 2002 no depois sai nu’udar Primeiru-Ministru, ne’ebé hatudu lideransa vizionáriu hodi harii hikas nasaun, hamoris fali ekonomia no promove koezaun sosiál.”
Komité mós rekoñese Xanana Gusmão nia papél nu’udar “Fundadór g7+: Plataforma Globál ida ba Nasaun sira ne’ebé Afeta hosi Konflitu”, hodi destaka katak “iha ninia lideransa, g7+ sai hanesan modelu ida atu rezolve rekuperasaun pós-konflitu no dezenvolvimentu sustentável, hetan rekoñesimentu globál ba ninia impaktu iha konstrusaun pás no kooperasaun”.
Sunhak hanesan fundasaun ida ne'ebé kria husi Dra. Hak Ja Han Moon no Rev. Sun Myung Moon, dedikadu ba dame globál no direitus umanus. Iha tinan 2015, lansa Prémiu Pás Sunhak hodi rekoñese kontribuisaun exesionál iha área sira-ne'e, hodi foka ba pilár direitus umanus, rekonsiliasaun no sustentabilidade ambientál. Prémiu ne'e fó kada tinan rua hosi komité internasionál ida durante serimónia ida iha Koreia Súl, hodi destaka inisiativas ne'ebé oferese solusaun konkretu ba dezafiu global sira. Prémiu Fundadór ne’e fó omenajen, ho maneira espesiál, ba figura ne'ebé nia realizasaun sira reflete ideál sira ne'e.
