Governu Timor-Leste

Primeiru-Ministru, Kay Rala Xanana Gusmão, akompaña hosi membrus Governu, diplomata no dirijente Empreza Públika Eletrisidade Timor-Leste (EDTL, E.P.), iha loron 9 fulan-janeiru tinan 2025, hala’o lansamentu konstrusaun subestasaun Komoro no rede transmisaun 150 kilovolt (kV). Serimónia ne’e hala’o iha Fomentu II, iha Postu Administrativu Dom Aleixo, Munisípiu Dili. 

Objetivu prinsipál harii subestasaun ne’e atu halo balansu ba distribuisaun eletrisidade iha sidade Dili, liu-liu iha area oeste. Aleinde ne’e, sei funsiona hanesan alternativa ida hodi garante fornesimentu enerjia durante operasaun hodi halo manutensaun ka bainhira akontese fallansu sira iha sub-estasaun Kamea-Bekora, ne'ebé daudaun ne'e fornese ba Dili, Ermera no Aileu.

Projetu ne’e inklui instalasaun transformadór unidade tolu ho kapasidade 120 MVA, ekipadu ho asesóriu modernu, inklui Sistema SCADA, no rede transmisaun 150 kV ho naruk maizumenus kilómetru lima iha sirkuitu duplu. Infraestrutura ida-ne’e ho objetivu atu reforsa fornesimentu eletrisidade iha territóriu nasionál tomak, hodi garante kualidade enerjia ba uma, instituisaun Estadu, eskola, atividade komersiál no industriál sira. 

Implementasaun projetu ne’e bazeia ba estudu viabilidade ne’ebé hala’o durante maizumenus tinan ida husi kompañia konsultoria PT. Amythas JV, PT. Hexa Integra Electrica no Caiulu Unip, Lda. Kontratu, ho orsamentu maizumenus dolar millaun 22, ho durasaun ne’ebé prevee fulan 15 no hala'o hosi empreza internasionál TBEA. Obra sira ne'e kalkula atu remata iha fulan-janeiru 2026.

Durante serimónia ne’e, Primeiru-Ministru destaka relevánsia estratéjika hosi projetu ida-ne’e ba modernizasaun infraestrutura enerjétika Timor-Leste nian, hodi subliña ninia importánsia atu garante fornesimentu ida ne’ebé estavel no efisiente ba populasaun.