Primeiru-Ministru Partisipa iha Lansamentu Estudu Sísmiku ba Esplorasaun Minarai no Gás iha Kosta Súl
Primeiru-Ministru, Kay Rala Xanana Gusmão, akompaña hosi Ministru Petróleu no Rekursus Minerais, Francisco da Costa Monteiro, lansa ofisialmente, iha loron 11 fulan-janeiru 2025, projetu levantamentu sízmiku iha postu administrativu Natarbora, iha Munisípiu Manatutu. Estudu ida-ne’e ho objetivu atu avalia viabilidade ba esplorasaun mina no gás iha área Bloku Pualaka, ne’ebé lokaliza iha kosta súl Timor-Leste nian, ne’ebé kobre área 1.575 km² no munisípiu tolu: Manatutu, Manufahi no Vikeke. Inisiativa ne’e lidera hosi TIMOR GAP, hamutuk ho Autoridade Nasionál Petróleu (ANP), no eventu lansamentu ne’e hala’o iha Salaun Parokiál Natarbora. 
Antes eventu ne’e hala’o serimónia tradisionál ne’ebé lidera husi lian-na’in husi munisípiu sira ne’ebé envolve, hala’o iha kalan antes, atu husu lisensa husi natureza hodi loke dalan ba prosesu investigasaun iha Bloku Pualaka ba munisípiu tolu ne’e. 
Hafoin tesi fita, Primeiru-Ministru apela ba populasaun munisípiu tolu ne’e atu kolabora ho tékniku sira, nune’e prosesu prospesaun ne’e bele la’o ho susesu no perfurasaun bele hala’o, ne’ebé lori benefísiu ba povu no nasaun ne’e. 
Iha serimónia ne’e, Primeiru-Ministru husu kolaborasaun hosi populasaun no autoridade lokál sira hosi munisípiu tolu ne’e hodi garante susesu hosi estudu sízmiku ne’e. “Importante tebes atu ema hotu servisu hamutuk atu nune’e projetu ne’e lori benefísiu konkretu ba ita-nia povu no ita-nia rain,” dehan Kay Rala Xanana Gusmão. 
Ministru Petróleu no Rekursus Minerais, Francisco Monteiro, destaka importánsia hosi estudu ida-ne’e hodi konfirma potensiál enerjétiku rejiaun nian.
Serimónia ne’e hetan partisipasaun husi Ministru Justisa, Sérgio de Jesus Fernandes da Costa Hornai, Ministra Solidariedade Sosiál no Inkluzaun, Verónica das Dores, Ministru Agrikultura, Pekuária, Peskas no Florestas, Marcos da Cruz, no Sekretáriu Estadu Dezenvolvimentu Lokál, Mateus dos Santos Tallo. Marka prezensa mós Embaixadór Xina iha Timor-Leste, veteranus, prezidente Autoridade Munisipál Vikeke no Manatutu, dirijente no funsionáriu sira TIMOR GAP nian, nune’e mós reprezentante komunidade lokál sira no entidade relevante sira seluk. 
