Prezidente foun ba Konsellu Diretivu Tatoli simu pose
Iha loron 10 fulan-janeiru tinan 2025, Sekretáriu Estadu Komunikasaun Sosiál, Expedito Dias Ximenes fó pose ba Noémio Mateus Soares Falcão, nu’udar Prezidente ba Konsellu Diretivu Tatoli – Ajénsia Notisioza Timor-Leste, I.P., iha serimónia ida ne’ebé hala’o iha Palásiu Governu. Nomeasaun ba Noémio Falcão, ne’ebé aprova husi Konsellu Ministrus iha loron 11 fulan-dezembru tinan 2024 liubá, fó ba nia ho mandatu tinan haat. 
Durante serimónia, Sekretáriu Estadu Komunikasaun Sosiál foka-liu papél estratéjiku Tatoli nian no apela ba prezidente foun atu fortalese instituisaun ne’e, hodi transforma sai ajénsia notísias ida ne’ebé loos, iha kapasidade atu “fornese informasaun ba mídia nasionál, rejionál no internasionál sira seluk”.
Noêmio Falcão kompromete atu lidera instituisaun ne’e ho “izensaun, dedikasaun no responsabilidade ne’ebé másimu no tau nafatin iha konsiderasaun loloos interese Estadu nian”. Iha ninia diskursu, nia reforsa ninia kompromisu hodi konsolida Tatoli nu’udar ajente fornesedór informasaun ofisiál, tantu iha nivel nasionál no mós internasionál. 
Noémio Falcão dezempeña funsaun oioin iha área komunikasaun no jornalizmu, inklui Jestór Produsaun no Editór iha Timor Post, no Xefe Redasaun hosi tinan 2015 to’o 2019. Foin lalais ne’e, nia hala’o knaar nu’udar Asesór ba Mídia iha Sekretaria Estadu Komunikasaun Sosiál.
Serimónia ne’e hetan partisipasaun husi, Sekretária Estadu Igualdade, Elvina de Carvalho, Prezidente Konsellu Diretivu Rádiu no Televizaun Timor-Leste nian, José Belo, dirijente sira hosi órgaun komunikasaun sosiál privadu no funsionáriu sira hosi Tatoli.
Iha loron 7 fulan-marsu tinan 2017, Konsellu Ministrus aprova ona kriasaun TATOLI – Ajénsia Notisioza Timor-Leste, IP, ho objetivu prinsipál ajénsia nian “atu sai fonte informasaun ofisiál, prodús informasaun ba públiku ho eskala nasionál, rejionál no internasionál”. 
