Governu Timor-Leste

Iha loron 19 Dezembru 2024, hala’o serimónia fatuk dahuluk edifísiu foun Rádiu no Televizaun Timor-Leste (RTTL, EP) nian. Eventu ne’e hetan partisipasaun husi Primeiru-Ministru, Kay Rala Xanana Gusmão, Sekretáriu Estadu Komunikasaun Sosiál, Expedito Dias Ximenes, no Prezidente RTTL, José António Belo, no mós reprezentante korpu diplomátiku no parseiru dezenvolvimentu sira.

Konstrusaun ba edifísiu foun, ne'ebé previstu atu remata iha fulan-Marsu 2026, reprezenta investimentu ida ho dolar amerikanu millaun 5,7. Finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (PNUD). Aleinde konstrusaun, projetu ne’e inklui formasaun téknika ba jornalista sira no profisionál RTTL sira seluk, ho objetivu atu hametin abilidade ekipa nian hasoru ezijénsia komunikasaun modernu no efetivu.

Komplexu foun sei inklui auditóriu ida, estúdiu sira gravasaun nian no sala sira ba hakerek no produsaun konteúdu nian. Fatin ida-ne'e dezeña atu sai funsionál no reziliente, hodi hatán ba kondisaun adversa sira ne'ebé afeta edifísiu atuál, liuliu estragu sira ne'ebé kauza hosi inundasaun sira iha tinan 2021, ne'ebé kompromete funsionamentu loloos estasaun nian.

Iha reuniaun estraordinária Konsellu Ministru nian, ne’ebé hala’o iha loron 16 fulan-Dezembru tinan 2024, deside atu hanaran edifísiu sentrál RTTL nian tuir Francisco Borja da Costa, enkuantu auditóriu sei hanaran Nino Konis Santana. Iha enkontru hanesan, Konsellu Ministru mós rezolve katak estúdiu multifunsaun ne’e sei hanaran “David Alex ‘Daitula’”.