Timor-Leste Defende Direitu Estadu Illa Ki’ik sira iha Tribunál Internasionál Justisa Hasoru Mudansa Klimátika
Timor-Leste fahe (12/12) ninia perspetiva nu’udar Estadu Ki’ik iha Dezenvolvimentu (SIDS, sigla Inglés) no País Menus Dezenvolvidu (LDC, sigla Inglés) hamutuk ho Estadu 100 seluk ne’ebé aprezenta submisaun iha Tribunál Internasionál Justisa (ICJ, sigla Inglés), iha Haia, Olanda, kona-ba ninia Pareser Konsultivu importante kona-ba obrigasaun husi Estadu sira relasiona ho mudansa klimátika. 
Reprezentante Timor-Leste, Chefe Gabinete Primeiro-Ministro ni’an no Diretora Ezekutiva Gabinete Fronteiras Terrestres no Marítimas (GFTM), Sra. Elizabeth Exposto, subliña katak enkuantu nasaun hotu-hotu fahe devér komún ida atu kombate mudansa klimátika, sira-nia responsabilidade tenke reflete kontribuisaun istóriku sira ba problema ne’e no sira-nia kapasidade atu rezolve problema ida-ne'e.
Sra. Exposto reitera tanba saida maka prinsípiu responsabilidade komún maibé diferensiadu no kapasidade sira atu kombate mudansa klimátika fundamentál tebes.
Nia destaka katak resposta ba mudansa klimátika labele nega País Menus Dezenvolvidu sira, inklui Timor-Leste nia direitu ba dezenvolvimentu no atu dezenvolve sira-nia rekursu naturál sira, tuir prinsípiu autodeterminasaun no soberania permanente ba rekursu naturál sira. 
Timor-Leste nia Embaixadór-Jerál ba Asuntu Klimátiku, Sr. Adão Barbosa, iha nia diskursu hatutan tan katak “Estadu Ki’ik iha Dezenvolvimentu selu tiha ona folin a’as tanba krize klimátika. Ami labele nafatin hetan susar ne’ebe sei impata ami-nia redusaun ki’ak no dezenvolvimentu sustentável. Ita labele husu nafatin ba SIDS no LDC sira atu uza rekursu naturál sira ba sira-nia dezenvolvimentu sósiu-ekonómiku no atu finansia resposta sira ba mudansa klimátika, liu-liu tanba sira-nia kontribuisaun ba problema mudansa klimátika ne'e ladún makaas.”
Entretantu, Konselleiru Jurídiku Timor-Leste nian, Eran Sthoeger, hakotu submisaun Timor-Leste nian ba Tribunál Internasionál Justisa, foka ba Konvensaun Kuadru Nasoins Unidas nian kona-ba Mudansa Klimátika (UNFCCC, sigla Inglés), Artigu 40, ne’ebé hateten katak tratadu sira kona-ba klimátika nia implementasaun tenke konsidera pozisaun husi Estadu sira ho ekonomia ne'ebé "dependente tebes ba rendimentu ne'ebé maka hetan hosi produsaun, prosesamentu no esportasaun, no/ka konsumu kombustível fósil sira.”
