Governu Timor-Leste

Edisaun daruak husi programa Futuru Lider ba ASEAN (FLBA), simu kandidatura 470 resin. Prosesu entrevista, ne'ebé hahú ona, sei hala'o to'o fulan-dezembru 2024 nia rohan, ho objetivu atu hili grupu hosi lider futuru na'in-100 ne'ebé sei hahú programa ne’e iha tinan 2025. 

Prosesu selesaun hala'o hosi painél ida ne'ebé kompostu hosi asesór sira FLBA nian no eis-formandu sira hosi edisaun dahuluk programa nian. Kandidatu sira ne'ebé inskreve ona hetan enkorajamentu atu verifika beibeik sira-nia email no xamada telefónika sira hodi garante katak sira simu konvite ba entrevista. 

Iha okaziaun lansamentu edisaun dahuluk programa nian, Primeiru-Ministru Kay Rala Xanana Gusmão destaka katak “Timor-Leste nia dezenvolvimentu dependente makaas ba ita-nia rekursus umanus no kapasitasaun ba ita-nia potensiál umanu. Tanba ne'e mak ita investe iha jerasaun lider sira tuirmai”. Primeiru-Ministru mós hato’o nia fiar “katak investe iha lider sira iha futuru sei ajuda ita-nia nasaun hasoru di’ak liután dezafiu globál sira, promove inovasaun no kontribui ba futuru ida ne’ebé sustentável no prósperu”. 

FLBA hanesan programa intensivu durante fulan 12 ne’ebé kria atu kapasita lider foin-sa’e sira liuhosi formasaun lideransa, esperiénsia loron sanulu iha nasaun ASEAN ida, projetu aprendizajen asaun ne’ebé foka ba dezenvolvimentu estratéjiku Timor-Leste nian, no planeamentu karreira ne’ebé orientadu ba lideransa no empreendedorizmu. 

Programa ne’e finansia husi Governu Timor-Leste, liuhusi Ministériu Negósius Estranjeirus no Kooperasaun, programa ne’e nia objetivu prinsipál mak atu prepara lider jerasaun tuirmai nasaun ne’e nian hodi kontribui ba dezenvolvimentu nasionál no integrasaun iha ASEAN. Programa ne’e lidera husi Gabinete Vise-Ministra ba Asuntus ASEAN nian iha Ministériu Negósius Estranjeirus no Kooperasaun.