Governu no TIMOR GAP asina Memorandu Entendimentu kona-ba dezenvolvimentu potensiál rekursus gás PSC Chuditch nian
Governu, ne'ebé reprezenta hosi Ministériu Petróleu no Rekursus Minerais, asina Memorandu Entendimentu ida iha loron 12 fulan-dezembru tinan 2024 ho empreza públika TIMOR GAP, E.P. (empreza kontroladór husi TIMOR GAP Chuditch Unipessoal Lda — parseiru Joint Venture (JV) iha Kontratu Fahe Produsaun TL-SO-19-16, dezignadu hanesan “PSC Chuditch”) no SundaGas Banda Unipessoal, Lda (subsidiária integrál husi Sunda Energy Plc ), operadór husi PSC Chuditch. Memorandu ida-ne’e estabelese enkuadramentu hodi avalia hamutuk konseitu dezenvolvimentu ida ba rekursus gás iha PSC Chuditch, inklui esportasaun gazodutu ba kampu Bayu-Undan no ba futuru instalasaun Gás Naturál Likefeitu (GNL) iha kosta súl Timor-Leste. 
Liuhusi Memorandu ida-ne’e, SundaGas ho nia parseiru konsórsiu, TIMOR GAP Chuditch Unipessoal, Lda, konkorda atu servisu besik ho Ministériu Petróleu no Rekursus Minerais no Autoridade Nasionál Petróleu Timor-Leste (ANP) hodi planeia aselerasaun dezenvolvimentu gás Chuditch nian hafoin perfurasaun ba posu avaliasaun Chuditch-2, ne'ebé hein iha trimestre daruak tinan 2025. Hodi antesipa teste fluksu produsaun (“DST”) ne'ebé susesu iha posu Chuditch-2, parte sira ne'ebé envolve hala'o hela estudu tékniku no komersiál sira hodi avalia viabilidade ("Estudu Viabilidade") ba dezenvolvimentu gás Chuditch, ho esportasaun liuhosi gazodutu ba instalasaun sira ne'ebé eziste iha kampu gás Bayu-Undan no transmisaun tuirmai ba unidade LNG ida ne'ebé sei lokaliza iha tasi-ibun iha súl Timor-Leste nian (iha rejiaun Natarbora). Estudu sira-ne’e hahú tiha ona.
Bazeia ba konseitu dezenvolvimentu ne’ebé deskreve ona no sujeita ba susesu DST iha posu avaliasaun Chuditch-2, SundaGas, operadór PSC Chuditch, sei kompromete atu fornese gás ba Timor-Leste liuhosi instalasaun Bayu-Undan, ho taxa produsaun no durasaun ne’ebé konkorda ona antes. Ministériu Petróleu no Rekursus Minerais no/ka nia afiliadu sira sei kompromete atu aselera dezenvolvimentu infraestrutura nesesáriu ba transporte no simu gás iha Bayu-Undan no rai-maran, inklui instalasaun gazodutu esportasaun husi rejiaun Bayu-Undan ba kosta súl Timor-Leste nian. Entidade sira-ne'e mós sei kompromete atu sosa gás hosi kampu Chuditch hodi apoia finansiamentu projetu nian. Kompromisu sira-ne'e la'ós vinkulativu no sujeita ba kompletasaun dokumentasaun vinkulativu iha futuru entre parte sira.
Kampu gás Chuditch nian deskobre hosi Shell iha tinan 1998 liuhosi fura posu Chuditch-1. Agora daudaun opera hosi SundaGas Banda Unipessoal, Lda., ne'ebé kaer 60% hosi lisensa, iha parseria ho TIMOR GAP Chuditch Unipessoal Lda., ne'ebé kaer restu 40%. Estudu sira ne'ebé hala'o hosi SundaGas konfirma rekursu gás kontinjente sira ho triliaun 1.16 pés kúbikus (TCF) iha kampu Chuditch, aleinde rekursu prospetivu adisionál sira ho 1.65 TCF iha área sira ne'ebé besik. 
Posu avaliasaun foun ida, Chuditch-2, tuir planu sei fura iha 2025, ne'ebé lokaliza liu 5 km hosi posu orijinál. Posu ida-ne'e ho objetivu atu konfirma viabilidade komersiál kampu nian, inklui prezensa hosi koluna gás nian ne'ebé kalkula besik metru 150. Preparasaun sira ba perfurasaun Chuditch-2 hala'o daudaun ona.
