Governu Timor-Leste

Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente Timor-Leste, Francisco Kalbuadi Lay, partisipa iha Forum Internasionál kona-ba Rai no Bee tinan 2024, ne’ebé hala’o iha loron 9 to’o 11 fulan-dezembru, iha Bangkok, Tailándia. Eventu ne’e organiza husi Organizasaun Nasoins Unidas ba Ai-han no Agrikultura (FAO, sigla iha lian inglés) no Governu Tailándia, halibur lider mundiál sira hodi ko’alia kona-ba solusaun falta bee no rai ne’ebé sai ladi’ak ba agrikultura, dezafiu krítiku rua ba seguransa ai-han no kumprimentu ba Objetivu Dezenvolvimentu Sustentável (ODS). 

Iha ninia diskursu iha sesaun abertura, Vise-Primeiru-Ministru ko’alia-liu kona-ba kompromisu Timor-Leste nian, hanesan nasaun joven ne’ebé dependente maka’as ba agrikultura, atu promove prátika agríkola sustentável, hasa’e produtividade rai no implementa jestaun bee komunitária. Nia mós subliña nesesidade atu integra solusaun sustentável hodi prezerva rekursu naturál no dezenvolve infraestrutura sira ne'ebé reziliente ba mudansa klimátika, hodi nune'e bele proteje país kontra xoke ambientál, hasa’e kreximentu sustentável no garante konservasaun ambientál.

Governante ne’e mós destaka papél inovasaun nian nu’udar katalizadór ba mudansa, ne’ebé foka-liu ba vizaun estratéjika Governu Timor-Leste nian hodi adota teknolojia agríkola avansadu no investe iha dezenvolvimentu kapitál umanu.

Forum ne'e konta mós ho intervensaun hosi Diretór-Jerál FAO, Qu Dongyu, no Enviada Espesiál Sekretáriu-Jerál ONU nian ba Bee, Retno Marsudi, ne'ebé fahe vizaun no solusaun globál ba jestaun integradu bee no rekuperasaun ba rai ne'ebé la di’ak ba agrikultura.

Iha enserramentu, nasaun partisipante sira, inklui Timor-Leste, asina Deklarasaun Ministeriál ida ne’ebé define Ajenda Asaun Konjunta ida bazeia ba evidénsia sientífika no inovasaun teknolójika sira. Kompromisu ida-ne’e ho objetivu atu promove prátika sira ne’ebé sustentável, hasa’e efisiénsia uza bee no proteje ekosistema

Komitiva timoroan ne’e inklui mós Ministru Agrikultura, Pekuária, Peskas no Florestas, Marcos da Cruz, no Vise-Ministru Asuntus Parlamentares, Adérito Hugo da Costa. Sira na'in-rua partisipa iha sesaun temátiku no debate ministeriál sira ne'ebé foka ba jestaun integradu rai no bee nian no solusaun reziliente ba mudansa klimátika.

Forum Internasionál kona-ba Rai no Bee ne’e nu’udar plataforma importante ida atu fahe prátika di'ak, inovasaun no parseria sira, hodi promove transformasaun globál ba sistema agro-alimentár ne'ebé sustentável no reziliente liu.