Ministériu Administrasaun Estatál Iha Edisaun Daruak Programa “Pájina Governu Konstitusionál da-9 nian”
Iha loron 10 fulan-dezembru tinan 2024, grava edisaun daruak hosi programa televizivu “Pájina Governu Konstitusionál da-9 nian”, inisiativa ida ne’ebé promove hosi Ministru Prezidénsia Konsellu Ministrus, Agio Pereira, nu’udar Portavós Governu nian, iha parseria ho Rádiu no Televizaun Timor-Leste (RTTL). Iha edisaun ida-ne'e, entrevistadu maka Ministru Administrasaun Estatál, Tomas do Rosário Cabral, ne'ebé destaka realizasaun prinsipál sira hosi ninia ministériu no planu sira ba períodu tina 2023 to'o 2028.
Ho objetivu atu reforsa transparénsia no diálogu entre Governu no sidadaun sira, programa ne’e lidera hosi aprezentadora Nélia Chaves no grava iha resintu Palásiu Governu nian. Ho Ika Moniz hanesan produtora, programa ne'e hetan apoiu tékniku hosi ekipa mídia sira hosi Gabinete Primeiru-Ministru, Prezidénsia Konsellu Ministrus no Ministériu Administrasaun Estatál. 
Edisaun ida-ne’e foka kona-ba dezempeñu Ministériu Administrasaun Estatál (MAE) iha kontestu ezekusaun Orsamentu Jerál Estadu no programa prioridade sira ba tinan oin mai. Entre tópiku sira ne'ebé aborda ona maka desentralizasaun administrativa, hametin kapasidade hosi órgaun lokais no munisipais, no modernizasaun ba administrasaun públika.
Iha entrevista ne’e, Ministru Tomas do Rosário Cabral hatán ba pergunta sira kona-ba progresu desentralizasaun administrativa nian, dezafiu sira ne’ebé hasoru iha implementasaun polítikas públikas no medidas ne’ebé foti ona atu kapasita munisípius no órgauns lokais, hodi garante prestasaun servisus públikus ho kualidade. Diskute mós kestaun sira hanesan aprovasaun ba alterasaun Lei Divizaun Administrativa Territóriu nian, ne’ebé define filafali kualifikasaun jurídiku-administrativa Illa Ataúro nian, no koordenasaun ho Rejiaun Administrativa Espesiál Oe-kusi-Ambenu (RAEOA) iha ámbitu desentralizasaun. 
“Pájina Governu Konstitusionál da-9 nian” nu’udar plataforma komunikasaun ida ne’ebé kria atu hakbesik Ezekutivu ba populasaun, hodi fó informasaun ne’ebé klaru, faktuál no kredivel kona-ba asaun governu nian. Ministru Agio Pereira destaka, iha okaziaun lansamentu programa ne’e, katak “inisiativa ida-ne’e reflete kompromisu Governu Konstitusionál IX nian ba transparénsia no prestasaun kontas, hodi hakbesik instituisoins governamentais ba povu timoroan”.
Programa ne'e iha tempu badak sei hahú fó-sai iha RTTL no iha rede sosiál ofisiál sira Governu nian. Populasaun hetan konvite atu akompaña espasu ida-ne’e ba diálogu hodi hatene kona-ba asaun sira Ministériu Administrasaun Estatál nian, ne’ebé ho objetivu atu promove dezenvolvimentu no hametin governasaun lokál.
