Forum Negósiu Timor-Leste iha Singapura Promove Oportunidade Investimentu
Governu Timor-Leste liu-hosi TradeInvest, MCI, SEAC no Embaixada Timor-Leste iha Singapura servisu hamutuk ho Singapore Manufacturing Federation (SMF) organiza "Timor-Leste Trade and Investment Forum", iha loron 2 fulan Dezembru 2024. 
Iha business forum ne'e partisipa direita hosi Ministru Komérsiu no Indústria Sr. Nino Pereira, Sekretáriu Estadu Arte & Kultura Sr. Jorge S. Cristovão, Governador Banco Central Sr. Helder Lopes, Embaixador Alex Tilman, Diretor Exekutivu TradeInvest Sr. Arcanjo da Silva, DG Ministériu Turizmu & Ambiente Sr. António da Silva, Vice Prezidente CCI-TL Sra. Herguilina Alves no ho bainaka importante Prezidente Federasaun Manufatureira Singapura Sr.Lennon Tan no Vice Prezidente Melvin tan. 
Sua eselénsia Ministru Komérsiu Indústria, Sr. Nino Pereira liuhusi intervista hateten, eventu espozisaun ida ne'e, ho esperansa ba futuru bele atrai liután investór sira iha área oin-oin bele hakbesik ba Timor-Leste.
"Forum ida-ne'e ita espera katak Timor-Leste sai nasaun destinasaun Investimentu, ita rekoñese Singapura mós durante ne'e troka komérsiu ho Timor-Leste, tanba ita servisu hamutuk ho Federasaun Manufara Singapura hodi konsolida tan investór sira iha Singapura no mós husi nasaun seluk,"_dehan Ministru MCI. 
Eventu ne'e hetan mós partisipasaun máximu hosi setor privadu Timor-Leste no Singapura. Business forum ne'e realiza ho objetivu fó serteza ba promosaun, explora no prova ba informasaun, garantia potensialidade setor produtivu ne'ebé sei fó impaktu pozitivu ba atrai investimentu direita hosi rai liur. Ho partilha informasaun ne'ebé los no kredivel hosi entidades relevantes governu nian sei garante konfiansa ba investidor, liu-liu hosi rai liur. 
Iha eventu refere Timor-Leste lori empreza ki’ik sira hodi mai aprenzenta sira-nia produtu kafé, tais, pintura no seluk tan.
“Iha esperansa boot hosi rejultadu ne'e katak Timor-Leste sei sai destinasaun atrativu ba investimentu, nune bele diversifika ekonomia, kriasaun empregu no neneik kore-an husi dependensia iha setor petróleu”.
Atividade Espozisaun ne'e realiza, hodi Komemora Loron Proklamasaun Independénsia Timor Leste ba dala-49 ne'ebé akontese ona iha loron 28 fulan Novembru 2024 foin lalais ne'e.
(versaun tétum sei atualiza)
