Diskursu kona-ba Unidade no Dezenvolvimentu husi Xanana Gusmão Reúne iha “The Sky is Ours”
Ohin, loron 6 fulan-dezembru tinan 2024, iha Salaun Nobre Ministériu Negósius Estranjeirus no Kooperasaun nian, hala'o lansamentu ofisiál ba livru “The Sky is Ours”, obra ida ne'ebé halibur diskursu no reflesaun sira hosi Primeiru-Ministru Kay Rala Xanana Gusmão, ne’ebé hato’o entre tinan 2017 no 2024, kona-ba tema sira hanesan unidade nasionál, prosperidade no dezenvolvimentu sustentável. 
“The Sky is Ours” reflete Timor-Leste nia perkursu hodi konsolida demokrasia, promove justisa sosiál no prezerva identidade kulturál. Obra ne’e ko’alia mós dezenvolvimentu ekonómiku sustentável no papél estratéjiku integrasaun rejionál nian, ho énfaze espesiál ba prosesu adezaun plena Timor-Leste nian ba ASEAN.
Diskursu sira ne'ebé halo parte iha livru ne'e halibur hosi Prezidénsia Konsellu Ministrus, ne'ebé maka responsavel mós ba nia produsaun.
Iha diskursu abertura ba eventu ne’e, Prezidente Repúblika, José Ramos-Horta, louva perkursu Kay Rala Xanana Gusmão nia luta ba libertasaun nasionál to’o manan prosesu foin daudaun ne’e, ne’ebé lori ba asina tratadu istóriku ne’ebé estabelese fronteira marítima definitiva entre Timor-Leste no Austrália. 
Portavós Governu Konstitusionál da-9 nian, Ministru Agio Pereira, destaka iha livru nia introdusaun katak “Xanana Gusmão nia diskursu sira, ne’ebé ami selesiona no disponibiliza ba públiku [iha obra ida-ne’e], hanesan ilustrasaun maka’as ida kona-ba obstákulu sira ne’ebé ita ultrapasa no susesu sira ne’ebé ita alkansa ona”.
Ministru destaka mós katak, ba Xanana Gusmão, “vitória ne’ebé manán ho susar maka hanesan inísiu de’it ba luta foun ida ba konstrusaun komunidade polítika ida ne’ebé, respeita memória hosi ninia eroi sira, sei brani luta kedas ba rekonsiliasaun entre timoroan tomak no, ho ultrapasa hanoin tuan sira, estabelese lalais relasaun sira kooperasaun no amizade nian ho povu viziñu sira”. 
Iha lansamentu ne’e hetan partisipasaun husi figura importante balun, inklui Prezidente Parlamentu Nasionál, Prezidente Tribunál Rekursu, Xefe Estadu-Maiór-Jenerál Forsa Armada, reprezentantes hosi Polísia Nasionál Timor-Leste (PNTL), Vise-Governadora Banku Sentrál Timor-Leste nian, membrus Parlamentu Nasionál, Governu, korpu diplomátiku, no mós parseiru dezenvolvimentu sira. 
