ANC fó lisensa ba Starlink hodi halo Servisus Internet ho Velosidade Aas
Iha loron 5 fulan-dezembru tinan 2024, Autoridade Nasionál Komunikasoins oficialmente fó lisensa jerál ba utilizasaun espetru rádiofrekuénsia ba Starlink, hodi permite empreza ne’e atu hahú komersializasaun ninia servisu internet iha país ne’e.
Starlink, ne’ebé halo operasaun husi SpaceX, utiliza konstelasaun satélite ho órbita ki’ik (LEO, low-earth-orbit) hodi fornese internet ho velosidade aas. Modelu ida-ne’e efetivu tebes iha rejiaun sira ne’ebé asesu limitadu, karun ka la iha asesu ba infrastrutura telekomunikasaun tradisionál.
Portavós Governu Konstitusionál IX, Ministru Agio Pereira, salienta katak "teknolojia ne’ebé Starlink utiliza sei permite atu lori internet ho velosidade aas ba área remota sira país nian, iha ne’ebé kobertura kabu fibra ótika nian sei lori tempu hodi implementa”.
