Governu Timor-Leste

Prezidente Repúblika, José Ramos-Horta, promulga iha loron 25 fulan-novembru liubá Lei n. 8/2024, loron 26 fulan-novembru tinan 2024, kona-ba Orsamentu Jerál Estadu (OGE, Akrónimu iha Lian Portugés) ba tinan 2025, ne’ebé agora publika ona iha Jornál Repúblika. Orsamentu ne’e, ho valór totál dolar amerikanu billaun 2,617, reprezenta kompromisu Governu Konstitusionál IX nian hodi fó prioridade ba investimentu iha infraestrutura estratéjika, promosaun kreximentu ekonómiku no hadi’a sidadaun sira-nia moris-di’ak.

Primeiru-Ministru, Kay Rala Xanana Gusmão, destaka, durante nia diskursu iha Parlamentu Nasionál, katak orsamentu ida-ne’e “liu fali kolesaun númeru no alokasaun verba de’it: ne’e hanesan deklarasaun intensaun nian ida; vizaun ida ne'ebé barani ba futuru; no roteiru konkretu ida hodi hasoru dezafiu sira no goza oportunidade sira”. Xefe Governu destaka katak OGE 2025 dezeña atu fó benefísiu ba sidadaun hotu-hotu, la haree ba ninia lokalizasaun ka kondisaun sosiál, hodi reafirma katak “ida-ne’e mak orsamentu ba povu no hosi povu”. 

OGE 2025 reflete vizaun estratéjiku Governu Konstitusionál IX nian atu harii sosiedade ida ne'ebé prósperu no justu liu. “Ita investe hela iha ita-nia futuru, garante katak Timor-Leste sai hosi dezafiu sira hanesan nasaun ida ne’ebé forte liu, unidu liu no prósperu liu”, deklara Primeiru-Ministru.

Ho valór totál dolar amerikanu billaun 2,6 aloka ba Administrasaun Sentrál, Rejiaun Administrativa Espesiál Oe-Kusi Ambenu (RAEOA) no Seguransa Sosiál, inklui Fundu Rezerva Seguransa Sosiál. Montante ida-ne’e inklui dotasaun dolar amerikanu billaun 2,07 ba Administrasaun Sentrál, millaun 482 ba Seguransa Sosiál no millaun 62 ba RAEOA.

OGE ba tinan 2025 kontinua estratéjia implementasaun prioridade sira ne’ebé hatuur iha Programa Governu nian, ho lema “Investe iha infraestrutura estratéjika, hametin ekonomia no hadi’a moris-di’ak sidadaun sira-nian”. Orsamentu ne’e formula bazeia ba Objetivu Estratéjiku Governu Konstitusionál IX nian, ho hanoin atu promove dezenvolvimentu sosioekonómiku Nasaun nian liuhusi investimentu alvu sira iha infraestrutura estratéjika, reforsu ekonómiku no inisiativa sira ne’ebé ho objetivu atu hadi’a sidadaun sira-nia moris-di’ak. OGE 2025 iha objetivu atu promove dezenvolvimentu ekonómiku no hadi’a kondisaun moris populasaun timoroan nian, liuhosi estratéjia ida ne’ebé klaru ne’ebé foka ba kreximentu ekonómiku ne’ebé sustentável, hadi’a servisu públiku sira no garante katak benefísiu sira husi dezenvolvimentu to’o ba sidadaun hotu-hotu.

Kona-ba infraestrutura estratéjiku, dolar amerikanu millaun 227,3 aloka ba konstrusaun, expansaun, reabilitasaun no manutensaun estrada no ponte sira, no mós ba implementasaun medida protesaun hasoru dezastre naturál sira, ho objetivu atu hadi’a konektividade no proteje komunidade sira hosi efeitu mudansa klimátika nian. Prevee ona mós dotasaun sira ba reabilitasaun Aeroporto Internacional Presidente Nicolau Lobato no ba kompletasaun fiu fibra ótika submarinu nian ne’ebé sei liga Timor-Leste ba Austrália. Expansaun hosi rede interna fibra ótika nian sei permite, hahú hosi tinan 2025, fornesimentu hosi internet ho velosidade aas iha Timor-Leste laran tomak. Iha setór eletrisidade, OGE prevee aumentu signifikativu iha subvensaun sira ba empreza públika EDTL, E.P., ho objetivu atu hadi’a no habelar fornesimentu kontínuu eletrisidade nian, liuliu iha área rurál no remota sira, hodi garante servisu ida ne’ebé estavel no abranjente liu. 

Iha setór rekursus naturais, proposta ne’e aloka dolar amerikanu millaun 40 hodi hadi'a zona industrial sira no extrasaun petróleu no minerais iha kosta súl nasaun nian, hodi kontribui ba dezenvolvimentu ekonómiku no hametin seguransa enerjétika.

Iha setór finanseiru, prevee investimentu dolar amerikanu millaun 5 iha kapitalizasaun Banku Sentrál Timor-Leste nian, ho objetivu atu reforsa estabilidade no reziliénsia sistema finanseiru nasionál nian.

OGE 2025 aloka parte signifikativu ida hosi despeza, besik dolar amerikanu millaun 406, hodi apoia sosiedade sivíl, saúde no servisu sosiál sira. Iha dezenvolvimentu kapitál umanu, dolar amerikanu millaun 17,2 aloka ba programa formasaun profisionál no téknika, no mós konsesaun bolsa estudu. Edukasaun mós sei simu dolar amerikanu millaun 145,8 ba konstrusaun eskola foun, formasaun ba profesór sira no hametin sistema jestaun edukativa.

Iha saúde, orsamentu aloka dolar amerikanu millaun 99,2 hodi hadi'a rede ospitál no sentru saúde sira iha Timor-Leste laran tomak, aleinde dolar amerikanu millaun 14,2 ba akizisaun no distribuisaun ai-moruk no ekipamentu médiku esensiál sira. Kona-ba protesaun sosiál, programa Bolsa da Mãe sei reforsa ho aumentu ida liu dolar amerikanu millaun 7, aumenta tan dolar amerikanu millaun 2,86 hodi hadi’a saúde no nutrisaun inan isin-rua no labarik sira nian. Proposta ne'e inklui mós transferénsia ida ho dolar amerikanu millaun 124,1 ba Orsamentu Seguransa Sosiál nian, aumentu ida ho dolar amerikanu 37,4 kompara ho 2024, ne'ebé reflete expansaun sistema Seguransa Sosiál nian no valór pensaun sosiál nian ba ferik-katuas no invalidés.