Lansamentu Feira ba Komemorasaun Aniversáriu Proklamasaun Independénsia Repúblika Demokrátika Timor-Leste nian ba da-49
Iha loron 23 fulan-novembru tinan 2024, Primeiru-Ministru, Kay Rala Xanana Gusmão, inaugura ofisialmente Feira ba Komemorasaun Aniversáriu Proklamasaun Independénsia Repúblika Demokrátika Timor-Leste (RDTL) nian ba da-49 ne’ebé realiza iha Lifau, Rejiaun Administrativa Espesiál Oe-Kusi Ambenu (RAEOA). Ho tema “Orgullu ho ita-nia identidade no kultura, ita harii futuru ida liberdade, justisa no esperansa ba ita-nia Povu”, selebrasaun sira ho objetivu atu fó onra ba marku istóriku hosi proklamasaun unilateral independénsia nian, ne’ebé akontese iha loron 28 fulan-novembru tinan 1975. 
Iha ninia diskursu abertura nian, Primeiru-Ministru apela ba povu atu husik hela laran-moras sira pasadu nian, hodi destaka rekonsiliasaun entre Timor-Leste no Indonézia nu’udar modelu inspiradór ida ba mundu. “Ha’u husu ba ema hotu atu haluha buat hotu ne’ebé akontese iha pasadu, tanba rekonsiliasaun ne’ebé Timor-Leste promove ho Indonézia sai ezemplu ba mundu tomak”, nia dehan.
Xanana Gusmão subliña mós importánsia atu simu ho laran-luak bainaka internasionál sira ne’ebé marka prezensa, inklui eis-jenerál indonéziu sira, hodi destaka simbolizmu hosi jestu ne’e hodi reforsa kompromisu Timor-Leste nian ba dame no armonia entre povu sira. “Ita tenke hatudu maturidade polítika no simu ema sira-ne’e ho laran-luak, tanba sei sai ezemplu boot ba mundu”, apela Xefe Governu. 
Primeiru-Ministru subliña mós katak selebrasaun sira ne’e la’ós festa de’it, maibé oportunidade atu hanoin hikas kona-ba jornada luta no sakrifísiu ne’ebé alkansa ona iha independénsia país nian. “Ita selebra la’ós atu halo festa ka dansa, maibé atu halo reflesaun, liuliu ba sira ne’ebé ohin loron ukun, katak povu manán ita-nia independénsia ho sira-nia raan no sira-nia isin”, nia destaka.
Feira Komemorativa ne’ebé organiza hosi Ministériu Komérsiu no Indústria iha parseria ho komisoins organizadoras nasionál no lokál, inklui programa kulturál no rekreativu ne’ebé boot, foka liu ba espozisoins produtu lokál sira, aprezentasaun muzikál entre aldeia no eskola sira, atrasaun ba motór no karreta, aleinde aprezentasoins artístikas husi grupu nasionál no internasionál sira. Eventu ne’e sei partisipa mós hosi delegasaun sira hosi Indonézia, hodi hametin lasus amizade no kooperasaun. 
Serimónia abertura ne’e partisipa husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, Vise-Primeiru-Ministru no Ministru Koordenadór Asuntus Sosiais, Mariano Assanami, Prezidente Autoridade RAEOA, Rogério Tiago de Fátima Lobato, membru Governu sira seluk, deputadu sira, autoridade lokál sira, reprezentantes Forsa Defeza Timor-Leste (F-FDTL) no Polísia Nasionál Timor-Leste (PNTL) nian, no mós bainaka espesiál sira seluk no populasaun ein jerál.
Ministru Administrasaun Estatál no Prezidente Komisaun Organizadora, Tomás do Rosário Cabral, agradese ba esforsu no kolaborasaun hosi entidade hotu-hotu ne’ebé envolve iha realizasaun eventu ida-ne’e, nune’e mós apoiu ne’ebé fó hosi Embaixada no Konsuladu Indonézia, ne’ebé fasilita lojístika nesesáriu hodi organiza eventu ne’e. 
