Governu Timor-Leste

Parlamentu Nasionál ohin, loron 20 fulan-novembru tinan 2024, iha votasaun finál globál, aprova Orsamentu Jerál Estadu (OJE) ba tinan 2025, ho totál dolar amerikanu billaun 2,617, ne’ebé ho objetivu atu promove investimentu iha infraestrutura estratéjika sira, reforsa ekonomia no hadi’a moris-di'ak sidadaun sira nian. Proposta Lei ne'e hetan aprovasaun ho votu 42 afavór, 23 kontra no laiha abstensaun. 

Iha ninia intervensaun finál, Primeiru-Ministru, Kay Rala Xanana Gusmão, elojia “debate ne’ebé hetan partisipasaun makaas no pozitivu”, no destaka katak “demokrasia ne’ebé halo parte ba identidade Timor-Leste nian, ezije atu bele respeita ideia diferente, proposta diferente no bele partilla ideia no proposta diferente sira ne’e liuhosi debate ida ne’ebé konstrutivu no sériu”. 

Primeiru-Ministru reafirma tan katak Governu sei kontinua halo esforsu atu realiza investimentu no fó onra ba kompromisus hodi garante katak kompromisu finanseiru sira-ne’e la afeta asesu ba futuru jerasaun rekursu nasionál sira. Pelu kontráriu, objetivu mak atu garante katak futura jerasaun bele hetan benefísiu husi rekursu sira ne’e, hodi promove dezenvolvimentu nasionál iha tempu badak, médiu no naruk.

Atu finaliza, nia sita fila-fali Papa Francisco, hodi fó-hanoin katak “buat di’ak liu no furak liu ne’ebé Timor-Leste iha maka ninia povu”. Xefe Governu ko’alia-liu kona-ba kompromisu Governu nian maka ba povu, hodi afirma katak “orsamentu ida-ne’e halo atu hanoin povu, atu ita bele dehan katak orsamentu ne’e ba duni povu.”  

Entre alokasaun prinsipál sira-ne’e, maka dolar millaun 654 ba infraestrutura estratéjika, dolar millaun 741 ba kapitál sosiál no dolar millaun 92,2 ba saúde. Investimentu iha edukasaun no formasaun ba joven sira ne’e, pilár esensiál ba futuru país hetan mós atensaun espesiál ida, liuliu ho dolar millaun 145,8 ba infraestrutura edukativa no millaun 17,2 ba bolsa estudu. Orsamentu ida-ne’e inkorpora mós medida sira ba fortalesimentu finansas públikas no kombate korrupsaun.

 Iha ninia intervensaun iha aprezentasaun Proposta Lei, Primeiru-Ministru, Kay Rala Xanana Gusmão, subliña katak OJE 2025 ne’e “liu fali kolesaun númeru no alokasaun verba de’it: ne’e deklarasaun intensaun nian ida; vizaun ida ne’ebé barani ba futuru; no roteiru konkretu ida hodi hasoru dezafiu no goza oportunidade sira.” Ho proposta ida-ne’e, Governu hakarak garante katak sidadaun hotu-hotu, “la haree ba fatin ne’ebé sira hela ka pozisaun sosiál”, sira bele goza husi “rezultadu kreximentu no dezenvolvimentu nian”. Ne’e mak orsamentu ba povu no husi povu”, afirma Primeiru-Ministru.

Governu Konstitusionál IX reafirma ninia kompromisu atu konsolida konkista sira husi tinan dahuluk mandatu nian no implementa planu ambisiozu ida ba dezenvolvimentu ne’ebé ho objetivu atu hadi’a moris-di’ak populasaun nian no promove kreximentu ekonómiku iha país ne’e. Orsamentu ida-ne’e reflete determinasaun Governu hodi hasoru dezafiu país nian ho forma estruturada no foka ba rezultadu konkretu ba populasaun.

Redasaun finál husi dokumentu ne’e sei submete agora ba Prezidente Repúblika hodi halo promulgasaun.