Timor-Leste Destaka Kompromisu ba Igualdade Jéneru iha Konferénsia Ministeriál Ázia-Pasífiku kona-ba Pekin+30
Vise-Ministra Solidariedade Sosiál no Inkluzaun, Céu Brites, no Sekretária Estadu Igualdade, Elvina Sousa Carvalho, reprezenta Timor-Leste iha Konferénsia Ministeriál Ázia-Pasífiku kona-ba Revizaun Pekin+30, ne’ebé hala’o iha Sentru Konferénsia Nasoins Unidas nian, iha Bangkok, Tailándia, husi loron 19 to’o 21 fulan-novembru tinan 2024. Durante ninia intervensaun iha Painél Altu Nivel, ne’ebé hala’o iha loron dahuluk Konferénsia ne’e, Sekretária Estadu destaka progresu ne’ebé Timor-Leste halo iha implementasaun Deklarasaun no Plataforma Asaun Pekin nian, hodi reafirma kompromisu Governu ba igualdade jéneru no empoderamentu feto. 
Iha ninia deklarasaun, Elvina Sousa Carvalho agradese ba Feto ONU no parseiru sira seluk ba sira-nia kolaborasaun kontínua ho Timor-Leste no subliña progresu sira ne’ebé hetan ona iha tinan lima ikus ne’e, liuliu iha redusaun ba mortalidade inan no oan, hasa’e reprezentasaun polítika feminina no implementasaun polítika no programa inkluzivu sira.
“Empoderamentu ekonómiku feto nian hanesan kondisaun esensiál atu hamenus moris-ki’ak no promove dezenvolvimentu ida ne’ebé inkluzivu. Governu komprometidu atu kria ambiente ida ne’ebé fó posibilidade atu halakon moris-ki’ak ne’ebé makaas tebes, ho atensaun espesiál ba feto no grupu sira ne’ebé vulneravel liu, inklui sira ne’ebé ho rendimentu ki’ik no sira ne’ebé hela iha área rurál”, afirma Sekretária Estadu ne’e. 
Rezultadu signifikativu sira inklui aprovasaun Planu Asaun Nasionál nian ba dala 3 hasoru Violénsia Bazeia ba Jéneru (2022-2032), Planu Asaun Nasionál ba Rezolusaun 1325 Konsellu Seguransa Nasoins Unidas nian kona-ba Feto, Pás no Seguransa, no hametin Deklarasaun Maubisi kona-ba Empoderamentu Ekonómiku Feto sira nian.
Haree ba dezafius ne’ebé iha, hanesan sei violénsia bazeia ba jéneru, Sekretária Estadu elojia esforsu sira ne’ebé koordena hosi Planu Asaun Nasionál atu prevene no kombate problema ida-ne’e, hodi destaka aumentu iha relatóriu krime nu’udar refleksu hosi mudansa sosiál ne’ebé pozitivu. 
Elvina Sousa Carvalho destaka mós impaktu hosi mudansas klimátikas ba feto sira no reafirma kompromisu Governu nian hodi garante aproximasaun transversál ida ne'ebé integra igualdade jéneru iha jestaun riskus dezastres nian.
“Maske Timor-Leste sei dook hela atu implementa tomak Deklarasaun Pekin, progresu ne’ebé alkansa ona dezde hetan ita-nia independénsia iha tinan 2002, hatudu katak ita la’o iha dalan loos. Iha parseria ho Nasoins Unidas no komunidade internasionál, ami fiar katak igualdade substantiva nu’udar objetivu ida ne’ebé bele alkansa”, hakotu Sekretária Estadu. 
Konferénsia Ministeriál Ázia-Pasífiku kona-ba Revizaun Pekin+30 halibur líderes, peritus no organizasaun sira hosi rejiaun tomak hodi avalia progresus no define prioridade sira atu alkansa igualdade jéneru no empoderamentu feto sira, hodi aliña esforsu ho Ajenda 2030 ba Dezenvolvimentu Sustentável.
Delegasaun husi Timor-Leste ne’e lidera husi Sekretária Estadu Igualdade, Elvina Sousa Carvalho, no Vise-Ministra Solidariedade Sosiál no Inkluzaun, Céu Brites. Komitiva ne’e inklui mós Diretór-Jerál husi Sekretária Estadu Igualdade, Armando da Costa, Konselleira ba Polítika Igualdade Jéneru Sekretária Estadu nian, Santina Soares, no Konselleiru no Enkarregadu Negósius Embaixada Timor-Leste iha Tailándia, Pedro Simões.
