Ministériu Ensinu Superiór, Siénsia no Kultura no Prezidénsia Repúblika organiza espozisaun Siénsia, Teknolojia no Inovasaun
Ministériu Ensinu Superiór, Siénsia no Kultura, serbisu hamutuk ho Prezidénsia Repúblika, hala’o Sci-Tech EXPO 2024, ne’ebé hala’o iha loron 15 no 16 fulan-novembru iha resintu Palásiu Prezidensiál Nicolau Lobato nian. Eventu ne’e destaka relevánsia hosi siénsia, teknolojia no inovasaun ba dezenvolvimentu sustentável Timor-Leste nian, hodi halibur estudantes, instituisoins ensinu, ajénsias internasionál no emprezas teknolojia. 
Hanesan parte hosi Programa Promosaun Turístika Timor-Leste nian, inisiativa ne’e ho tema “Siénsia, Teknolojia no Inovasaun: Dalan ba Transformasaun no Dezenvolvimentu Sustentável iha Timor-Leste” no ofisialmente loke hosi Prezidente Repúblika, José Ramos-Horta.
Iha serimónia abertura ne’e, Prezidente Repúblika dirije mensajen ida “ba estudantes no jovens Timor-Leste nian”, atu nune’e sira “konsentra [sira-nia] estudu iha área siénsia, teknolojia no inovasaun, atu nune’e bele dezenvolve ideias kriativas ne'ebé permite [sira] atu kontribui ba prosesu dezenvolvimentu ita-nia país nian.”
Xefe Estadu mós subliña impaktu hosi Sci-Tech EXPO 2024 tanba "espozisaun ida-ne'e reprezenta liu fali espozisaun teknolojia nian de'it", tanba ida-ne'e forma ita-nia nasaun nia kompromisu atu simu inovasaun nu'udar katalizadór ba dezenvolvimentu sustentável". Nia hatutan tan katak “atu investe iha edukasaun sientífika no teknolójika, ita la'ós harii de'it infraestruturas; ita investe iha mehi no kapasidade joven sira nian ne’ebé sei lidera Timor-Leste iha futuru.” 
Eventu ne'e hetan partisipasaun hosi espozitór hamutuk 36, inklui instituisoins ensinu superiór, ajénsias públikas no internasionais no emprezas teknolojia. Programa ne’e inklui feira ida husi ensinu superiór, aprezentasaun projetus inovativus, konkursus akadémikus, atividade kulturál no semináriu internasionál ida hodi fahe esperiénsia no ideia ba avansu sientífiku no teknolójiku.
Espozisaun ne’e atrai vizitantes atus ba atus, inklui estudantes hosi ensinu superiór no sekundáriu, membrus Governu no korpu diplomátiku, parseirus internasionais no públiku ein-jerál.
