Governu Timor-Leste

Ministru Ensinu Superiór, Siénsia no Kultura (MESSK), akompaña hosi Koordenadór Komisaun Koordenadora ba Universidade no Institutu Superiór sira (CUIS, Akrónimu iha Lian Portugés), Edmundo Viegas, no tékniku sira hosi ministériu no CUIS, iha loron 14 fulan-novembru tinan 2024, simu delegasaun ida husi Universidade Minho, Portugál, iha sala reuniaun ninia gabinete. Enkontru ne’e ho objetivu atu ko’alia kona-ba parseria sira iha futuru iha área Ensinu Superiór nian. 

Enkontru ho delegasaun husi Universidade Minho, ne’ebé kompostu husi Reitór Rui Vieira de Castro no Vise-Reitór ba Transformasaun Organizasionál no Simplifikasaun Administrativa, Luís Amaral, ho objetivu atu ko’alia kona-ba kooperasaun ne’ebé sei estabelese entre universidade portugés ida-ne’e ho ministériu, liuhusi CUIS. Prioridade diskusaun nian foka liu ba áreas hanesan formasaun ba profesór sira, ne'ebé CUIS define hanesan estratéjia koletiva prinsipál ida hodi hasa'e kualidade setór Ensinu Superiór nian. Estratéjia ida-ne’e inklui parseria ho universidade no instituisaun nasionál no internasionál sira hodi promove programa formasaun ne’ebé temi ona. 

Tema seluk ne’ebé destakadu maka papél eskola doutoramentu nian nu’udar instrumentu ida atu dezenvolve abilidade dosente no peskizadór sira nian, liuliu iha área ensinu, peskiza no publikasaun sientífika. Ko’alia-liu kona-ba nesesidade atu hadi'a nivel kualifikasaun hosi korpu dosente sira, hodi promove progresaun hosi kategoria sira ne'ebé daudaun ne’e avalia hanesan "Sufisiente" ba nivel sira ne'ebé aas liu, hanesan "Muito Bom" no "Exelente".