Vise-Primeiru-Ministru Inaugura Semináriu Internasionál AIFAESA nian kona-ba Seguransa no Kualidade Produtu ba Konsumidór sira
Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha loron 14 fulan-novembru tinan 2024, inaugura Semináriu Internasionál hosi Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA ), ne’ebé hala’o iha Hotel Timor, iha Dili. 
Ho tema “AIFAESA nia Papél hodi Garante Kualidade Produtu ba Konsumidór sira”, eventu ne’e halibur peritu nasionál no internasionál, parseiru dezenvolvimentu, reprezentantes entidade governamentál no estudante sira hodi diskute estratéjia ne’ebé garante kualidade no seguransa produtu ai-han iha merkadu nasionál. 
Durante nia diskursu abertura, Francisco Kalbuadi Lay destaka importánsia husi AIFAESA hanesan instituisaun xave ida hodi garante saúde públika no proteje direitu konsumidór sira nian. “AIFAESA hala’o serbisu krusiál ida. Semináriu ne’e aborda tema ida ne’ebé forte: kualidade ai-han ne’ebé fa’an iha merkadu nasaun nian tenke exelente hodi proteje konsumidór sira no promove saúde públika,” nia dehan. 
Inspetora Jerál AIFAESA nian, Odete da Silva Viegas, subliña mós papél fundamentál entidade nian iha supervizaun no fiskalizasaun ba produtu sira ne’ebé disponibiliza iha merkadu, hodi garante kumprimentu ba normas hosi operadór ekonómiku no seguransa ba konsumidór sira. “Semináriu ida-ne’e ho objetivu atu reforsa esforsu koletivu hodi proteje direitu konsumidór sira nian, hasa’e koñesimentu kona-ba tendénsia seguransa ai-han mundiál no hametin koordenasaun entre entidade setoriál sira hodi hasoru dezafiu sira iha futuru,” nia deklara. 
Eventu ne'e konta ho intervensaun hosi oradór internasionál oioin, inklui reprezentantes hosi Ajénsia Nasionál ba Kontrolu Medikamentu no Ai-han Indonézia nian (Badan POM), Organizasaun Mundiál Saúde (OMS) no Organizasaun Nasoins Unidas ba Dezenvolvimentu Industriál (UNIDO, Akrónimu iha Lian Inglés), ne'ebé fahe perspetiva internasionál sira kona-ba seguransa ai-han. Oradór nasionál sira husi AIFAESA, INSP-TL, Ministériu Agrikultura, Pekuária, Peska no Florestas, Ministériu Saúde no Asosiasaun Emprezariál Feto Timor-Leste mós kontribui ho reflesaun sira ne’ebé relevante ho kontestu lokál. 
Semináriu ne’e remata ho mensajen husi Inspetór Jerál AIFAESA, ne’ebé reafirma kompromisu instituisaun nian atu hametin fiskalizasaun, garante kumprimentu ba norma no proteje saúde no direitu konsumidór sira nian.
