Governu Timor-Leste

Iha loron 7 no 8 fulan-novembru tinan 2024, Timor-Leste simu vizita ofisiál hosi Ministra ba Komérsiu, Negósius no Relasoins ho Ázia hosi Territóriu Norte Austrália nian, Robyn Cahill, hanesan parte ida hosi hametin relasoins bilaterais no implementasaun Akordu Parseria Estratéjika 2023-2027 entre Governu rua. 

Ajenda ne’e inklui sorumutu ho Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay. Durante enkontru ne’e, analiza ona inisiativas ne’ebé la’o daudaun no esplora oportunidade sira hodi intensifika kooperasaun iha área estratéjiku sira hanesan ekonomia, edukasaun, turizmu no mobilidade laborál. Marka prezensa mós iha sorumutu ne’e Vise-Ministru ba Fortalesimentu Institusionál Saúde, José dos Reis Magno, Sekretáriu Estadu Formasaun Profisionál no Empregu, Rogério Araújo Mendonça, Prezidente Autoridade Turizmu Timor-Leste (ATTL, IP), Virgílio Simith, no Embaixadora Austrália ba Timor-Leste, Caitlin Wilson. 

Ministra Komérsiu, Negósius no Relasoins Aziátikas hosi Territóriu Norte Austrália ne’e, hatete katak hanesan “onra boot ida, mai Timor-Leste no hasoru malu ho Vise-Primeiru-Ministru” no espresa ninia satisfasaun kona-ba “hametin relasaun di’ak entre ita-nia nasaun no ho servisu ne’ebé ita bele dezenvolve hamutuk”.

Ministra hatutan tan katak Governu Territóriu Norte valoriza relasoins ho Timor-Leste no destaka área prioritária sira kooperasaun nian: “Ha’u haksolok ho oportunidade sira ne’ebé iha oin. Ami-nia intensaun mak atu fó apoiu ba Timor-Leste no Territóriu Norte iha setór sira hanesan ekonomia, edukasaun, negósius no turizmu.”

Molok vizita, Robyn Cahill subliña katak “Territóriu Norte no Timor-Leste iha relasaun ne’ebé úniku no metin, bazeia ba lasu ekonómiku, estratéjiku no kulturál.” Nia mós afirma katak enkontru sira ho Governu Timor-Leste “sei hametin relasaun internasionál no dudu progresu tuir Akordu Parseria Estratéjika 2023-2027 nian.”

Akordu Parseria Estratéjiku ne’e define baze ba kooperasaun bilaterál iha área-xave sira hanesan forsa traballu, komérsiu, investimentu, turizmu, saúde, agrikultura, preparasaun ba emerjénsia, desportu, arte no kultura. To’o agora, akordu ida-ne’e permite ona inisiativa signifikativu sira, inklui reforsa mobilidade laborál, fahe abilidade, programa formasaun no interkámbiu, no mós kolaborasaun iha área sira hanesan jestaun lafaek, marketing turístiku, dezenvolvimentu bioseguransa no prestasaun servisu emerjénsia nian. 

Durante ninia estadia, Ministra Robyn Cahill, akompaña husi Sekretáriu Estadu Rogério Araújo Mendonça, vizita Sentru Nasionál Empregu no Formasaun Profisionál (CNEFP, Akrónimu iha Lian Portugés). Delegasaun ne’e simu hosi Diretór CNEFP, Simão Tito Barreto, ne’ebé aprezenta área formasaun sira ne’ebé disponivel iha sentru ne’e, hanesan alvenaria, karpintaria, eletrisidade, kanalizasaun no soldadura, no seluk tan. Diretór ne’e destaka mós rezultadu ne’ebé hetan ona no impaktu pozitivu ba komunidade lokál, no agradese ba programa interkámbiu formadór entre CNEFP no sentru formasaun sira iha Territóriu Norte, liuliu iha Darwin. 

Ministra mós sai uma-na’in resesaun nian ba reprezentantes Governu, antigu alunu timoroan sira husi Charles Darwin University no sidadaun sira husi Territóriu Norte ne’ebé hala’o atividade emprezariál iha Timor-Leste.