Konvite ba aprezentasaun kandidatura faze daruak husi programa Futuru Lider ba ASEAN
Hafoin susesu programa nasionál dahuluk ba futuru lider Timor-Leste nian, ne’ebé lansa iha tinan 2024, Ministériu Negósius Estranjeirus no Kooperasaun, liuhusi Gabinete Vise-Ministra ba Asuntus ASEAN, fó-sai abertura kandidatura ba grupu daruak Futuru Lider 100, ne’ebé sei hahú iha tinan 2025
Programa Futuru Lider Ba ASEAN (FLBA) hanesan inisiativa estratéjika ida ne’ebé finansia husi Governu Timor-Leste ho objetivu atu prepara jerasaun lider nasaun nian ba aban-bainrua ba integrasaun tempu naruk iha ASEAN. Programa ne’e lidera husi Vise-Ministra ba Asuntus ASEAN, ho objetivu atu prepara jerasaun lider tuir-mai husi setór hotu-hotu iha país ne’e hodi asume responsabilidade ba dezenvolvimentu nasionál Timor-Leste nian ba tempu naruk iha rejiaun ASEAN.
Programa ne’e ho objetivus hanesan tuir-mai
1. Aselera preparasaun Timor-Leste nian ba lider jerasaun tuir-mai iha ASEAN no ba dezenvolvimentu nasionál.
2. Dezenvolve lider sira ho kapasidade no preparadu ba ASEAN, ne’ebé kompriende no bele serbisu ho instituisaun no Estadus-membrus ASEAN nian.
3. Fó espozisaun ba ASEAN no harii rede ho lider sira no futuru lider sira husi Estadus-membrus ASEAN nian.
4. Espoin futuru lider sira ba projetu estratéjiku dezenvolvimentu nasionál nian ba kreximentu ekonómiku ida ne’ebé responsavel, progresu sosiál no sustentabilidade ba país.
5. Asegura dezenvolvimentu karreira ba lideransa intersetoriál no empreendedorizmu iha Timor-Leste.
Informasaun sira kona-ba FLBA
FLBA ne’e nu’udar programa fulan 12 ne’ebé kompostu husi sesaun formasaun ba lideransa nian, espozisaun ba ASEAN liuhusi imersaun loron sanulu iha país ida ASEAN nian, projetu aprendizajen ne’ebé la’o hela ba dezenvolvimentu estratéjiku Timor-Leste nian no planeamentu ba dezenvolvimentu karreira lideransa nian.
Programa ne'e dezeña ba joven profisionál ativu sira ne'ebé sei kontinua serbisu durante fulan 12. Maibé, ida-ne'e maka programa aprendizajen intensivu ida. Kandidatu sira ne'ebé serbisu presiza hetan autorizasaun hosi sira-nia empregadór sira ba kompromisu tempu ida ho loron serbisu 25 ba formasaun no espozisaun internasionál, no mós tempu ne'ebé organiza rasik ba peskiza no relatóriu. Atu simu sertifikadu FLBA nu'udar futuru lider, presiza partisipa iha sesaun sira no hala'o serbisu ho kualidade ne'ebé avalia iha entrevista sertifikasaun nian.
Laiha taxa formasaun ne'ebé kobra ba kandidatus selesionadus. Kustu viajen ba ASEAN gratuita.
Programa FLBA selesiona grupu kandidatu oioin hosi setór no munisípiu hotu-hotu, inklui instituisoins hosi setór públiku, emprezas hosi setór privadu no emprezas ne’ebé foin hahú, organizasoins sosiedade sivíl nian, universidades no organizasoins internasionais.
Partisipante sira hetan selesaun ho kuidadu liuhosi prosesu kandidatura ida tuir fali ho entrevista individuál ida. Kandidatu sira ne'ebé maka selesionadu tenke ho idade entre tinan 23 no 37 no domina língua ingleza iha nivel profisionál.
Iha selesaun kandidatu, aplika kritériu oin-oin tuirmai:
- La fó preferénsia bazeia ba afiliasaun partidária ka fiar relijioza.
- Ekilíbriu jéneru.
- Ekilíbriu jeográfiku iha Timor-Leste laran tomak.
- Inkluzaun ema ho defisiénsia no grupu vulneravel sira seluk.
Prosedimentu aplikasaun nian
- Preenxe formuláriu aplikasaun FLBA online iha Inglés to'o loron 10 fulan-dezembru tinan 2024 https://forms.gle/1JsrUXt9Zs1iMpjt6.
- Hatama karta rekomendasaun husi ninia empregadór ka lider seniór husi ninia organizasaun ba Gabinete Vise-Ministra ba Asuntus ASEAN: cohort1.flba@gmail.com.
- Partisipa iha entrevista individuál ida ho painél selesaun nian, ne'ebé sei hahú iha loron 20 fulan-dezembru tinan 2024.
Bainhira iha dúvida ka pergunta ruma, haruka mensajen ba email:
