OJE 2025 aprova ona iha jeneralidade laiha votus kontra
Projetu Proposta Lei Orsamentu Jerál Estadu (OJE) ba tinan 2025 hetan aprovasaun husi Parlamentu Nasionál iha jeneralidade, iha sesaun plenária iha loron 8 fulan-novembru tinan 2024, ho votu afavór 42, kontra zero no abstensaun 22. 
Proposta ne’ebé aprezenta hosi Governu Konstitusionál IX, reflete kompromisu ba dezenvolvimentu sustentável no moris-di’ak populasaun timoroan nian, ho orsamentu globál dolar amerikanu billaun 2,617. Ho lema “Investe iha Infraestrutura Estratéjika, Hametin Ekonomia no Hadi’a Moris-di’ak sidadaun sira-nian”, governu reforsa ninia vizaun kona-ba futuru no kompromisu atu hatán ba nesesidade sosiedade nian.
Primeiru-Ministru Kay Rala Xanana Gusmão subliña katak OJE 2025 reprezenta vizaun ambisiozu no planu konkretu ida atu hasoru dezafius, propoin atu fó oportunidade ba sidadaun hotu-hotu, “la haree ba fatin ne’ebé sira hela ka sira-nia pozisaun sosiál”. Proposta ne’e kobre área prioridade sira, inklui infraestrutura, edukasaun, saúde, protesaun sosiál no setór petróleu, ho objetivu atu promove sosiedade ida ne’ebé prósperu no ekuitativu liu.
Entre alokasaun prinsipál sira maka, dolar amerikanu millaun 654 ba infraestrutura estratéjika sira, dolar amerikanu millaun 741 ba kapitál sosiál no dolar amerikanu millaun 92,2 ba saúde. Investimentu iha edukasaun no formasaun juventude nian, maka pilár esensiál ida ba futuru nasaun nian, hetan mós atensaun espesiál, liuliu ho dolar amerikanu millaun 145,8 ba infraestrutura edukativa sira no millaun 17,2 ba bolsa estudu. 
Orsamentu ida-ne’e inkorpora medida sira hodi reforsa finansas públikas no kombate korrupsaun, husi Xefe Governu subliña katak “transparénsia no jestaun ne’ebé di’ak maka fundamentál hodi garante katak rekursu públiku sira fó benefísiu ba povu tomak”.
Hafoin aprovasaun ida-ne’e iha jeneralidade, tuirmai sei halo análize ba OJE 2025 iha espesialidade, ho diskusaun no votasaun finál ne’ebé prevee ona husi loron 11 to’o 25 fulan-novembru.
Governu reafirma ninia kompromisu atu konsolida tinan dahuluk konkista mandatu nian no implementa planu dezenvolvimentu ambisiozu ida ne’ebé ho objetivu atu hadi’a moris-di’ak populasaun no promove kreximentu ekonómiku nasaun nian. Orsamentu ida-ne'e hatudu Governu nia determinasaun atu hasoru dezafiu nasaun nian ho dalan estruturadu no foka ba rezultadu konkretu ba populasaun. 
