Governu Konstitusionál IX Reafirma Prioridades: Kreximentu, Estabilidade no Moris-Di’ak ba Timoroan Hotu
Iha ámbitu debate Orsamentu Jerál Estadu ba tinan 2025, Governu Konstitusionál IX, liuhusi lideransa Primeiru-Ministru, Kay Rala Xanana Gusmão, reafirma nia kompromisu hodi konsolida konkista sira hosi tinan dahuluk iha mandatu no implementa planu dezenvolvimentu ambisiozu ida ne’ebé ho objetivu atu hadi’a populasaun nia moris-di’ak no promove kreximentu ekonómiku nasaun nian. Orsamentu ida-ne’e, prepara ho lema “Investe iha Infraestrutura Estratéjika, Hametin Ekonomia no Hadi’a Moris-Di’ak Sidadaun sira-nian”, hatudu Governu nia determinasaun hodi hasoru dezafiu nasaun ho dalan estruturadu no foka ba rezultadus konkretu ba populasaun.
Dezde simu pose iha loron 1 fulan-jullu tinan 2023, Governu Konstitusionál IX hahú ona reforma estruturál lubun ida no programa dezenvolvimentu iha área estratéjiku oioin, ne'ebé hakarak hametin baze ba kreximentu sustentável.
Tuirmai aprezenta progresu prinsipál ne’ebé alkansa ona, no destaka esforsus ne’ebé la’o daudaun hodi transforma Timor-Leste ba nasaun ida ne’ebé prósperu, seguru no reziliente liután.
INFRAESTRUTURAS
Governu Konstitusionál IX fó ona impulsu signifikativu ba dezenvolvimentu infraestrutura nasionál, área ida ne’ebé, iha tinan barak nia laran, pratikamente paradu. Obra hadi'a no konstrusaun oioin ba estrada no ponte sira ne’ebé hahú ka kompleta ona, nune'e mós konstrusaun no halo metin moru protesaun mota, drenajen no valeta sira iha kapitál no iha parte balu territóriu nasionál nian, ho objetivu atu hadi'a konetividade nasionál no hamenus risku husi inundasaun. 
Aleinde intervensaun esensiál sira-ne’e, Governu lansa projetu sira atu harii sistema abastesimentu bee no halo inisiativa oioin hodi reforsa no mantein rede elétrika nasionál, ho objetivu atu garante katak sidadaun sira iha asesu ba servisu sira ne’ebé iha kualidade.
Governu mós nafatin kompromete atu hadi’a konektividade Timor-Leste ho mundu, hodi fasilita dezenvolvimentu ekonómiku no setór turizmu. Iha tempu hanesan, estabelesimentu fibra ótika submariñu foin lalais ne'ebé liga Timor-Leste ba Darwin, Austrália, marka avansu importante ida iha infraestrutura dijitál nasaun ne’e, ho potensiál hodi transforma asesu internét no hadi'a indikadór ekonómiku nune’e mós dezenvolvimentu indústria foun sira ne'ebé antes ne’e labele halo.
Iha tempu hanesan, Programa Reflorestasaun ativa ona iha munisípiu tolu, hodi hasa’e reziliénsia klimátika no promove sustentabilidade ambientál.
Hodi adota aproximasaun estratéjiku ba infraestruturas, Governu la’ós hakarak de’it atu hadi’a kondisaun moris populasaun nian no hasa’e kapasidade atu hamenus dezastre naturál sira, maibé mós promove kreximentu ekonómiku no investimentu privadu, no permite kria empregu foun no promove dezenvolvimentu setór privadu. Inisiativa lubun ida ne’e reprezenta kompromisu ba dezenvolvimentu sustentável no konstrusaun ekonomia ida ne’ebé dinámiku no reziliente liu, diferente tebes ho falta investimentu no estagnasaun ne’ebé karakteriza períodu governu anterior nian.
SETÓR EKONÓMIKU
Iha dezenvolvimentu ekonómiku, prioridade maka hasa’e setór privadu, ho atensaun espesiál ba agrikultura no empreza ki’ik no médiu (PMEs, akrónimu iha lian portugés), no rekoñese katak kreximentu ekonómiku sustentável tenke promove hosi laran. Tanba ne’e, investimentu ne’ebé signifikativu aloka ona ba setór produtivu, hanesan agrikultura, peska no pekuária, no foku ba distribuisaun ró no ekipamentu sira iha setór peska no asinatura, memorandu entendimentu ida iha setór pekuária, hodi reforsa kontrolu pekuária no promove prátika sira ne'ebé sustentável. Objetivu husi atividade ne’e mak atu hasa’e produsaun lokál, hamenus dependénsia ba importasaun no insentiva inovasaun, nune'e promove ekosistema ekonómiku ida ne'ebé metin no reziliente liu. 
Governu adota ona inisiativa lubun ida hodi hasa’e setór agríkola, ho foku ba reabilitasaun no konstrusaun sistema irrigasaun no distribuisaun ekipamentus agríkola modernu. Estudu diagnóstiku ida mós hala'o ona iha áreas kuda kafé nian, ho objetivu atu kuda barak liután ai-horis importante ida-ne'e. Asaun sira-ne’e ho objetivu la’ós de’it atu hasa’e produtividade, maibé mós atu garante seguransa ai-han iha Timor-Leste laran tomak, promove dezenvolvimentu sustentável iha área rurál sira no kria baze ida ne’ebé sólidu ba ekonomia nasionál.
Hodi apoia integrasaun ekonómika globál no rejionál, Governu serbisu ona hodi implementa reforma estratéjika sira no hasa’e kapasidade nasionál, ne’ebé permite ona Timor-Leste ofisialmente sai membru ba dala-166 Organizasaun Mundiál Komérsiu (OMK) no iha dalan atu alkansa ninia adezaun plena ba ASEAN, ne’ebé prevee ona ba tinan 2025. Asina ona akordu bilaterál ho Xina no Indonézia, no sira seluk, atu hametin relasaun komersiál no ekonómika sira. Kompromisu ba integrasaun ekonómika ida-ne’e inklui dezenvolvimentu polítika sira ne’ebé kria ambiente ida ne’ebé favoravel no kompetitivu hodibele atrai investimentu no promove kreximentu tempu naruk nian. 
Governu mós enkoraja ona hodi hala’o forum emprezariál iha Timor-Leste no partisipasaun iha forum internasionál sira, ho objetivu atu aumenta posibilidade investimentu estranjeiru no habelar oportunidades ba empreza nasionál sira, nune'e mós haburas inovasaun no kria oportunidades ba empregu. Inisiativa hirak-ne’e ho objetivu la’ós de’it atu hametin ekonomia nasionál, maibé mós koloka Timor-Leste nu’udar parseiru atrativu no konfiavel iha rejiaun ne’e, hodi dudu kreximentu ekonómiku iha dalan inkluzivu no sustentável. Iha kontestu mobilidade no oportunidade servisu iha rai-li’ur, asina ona akordu ho Portugál, Japaun no Brunei, no hetan progresu ho loke tan programa servisu sazonál ho Austrália.
SETÓR SOSIÁL
Governu Konstitusionál IX hala’o ona programa abranjente ida kona-ba reforma estruturál iha setór sosiál, ho asaun estratéjiku sira iha área oioin hodi promove moris-di’ak populasaun no hasa’e kapasidade institusionál nasaun nian. Husi inisiativa prinsipál sira ne’e maka reforma iha setór judisiáriu, ne'ebé inklui kria planu asaun ida ba Sentru Formasaun Jurídika no Judisiária (CFJJ, Sigla iha Lian Portugés) no parseria ho universidade Direitu sira iha Portugál ba formasaun majistradu no defensór públiku. Haruka bolseiru timoroan sira ba Portugál halo parte iha inisiativa ida-ne'e, no hein katak husi jurista na'in-250 no 300 maka sei hetan formasaun to'o tinan 2028, ne’ebé sei kontribui hodi konsolida sistema judisiál ida ne'ebé metin no efisiente iha Timor-Leste.
Hanesan parte hosi polítika desentralizasaun no dezenvolvimentu rejionál, Governu avansa ona prosesu desentralizasaun ho objetivu atu reforsa autonomia lokál no promove dezenvolvimentu ekonómiku sai/fora hosi kapitál, hodi garante distribuisaun rekursu no oportunidade sira ne’ebé ekuitativu liu. Implementa mós inisiativa sira hanesan lansamentu Balkaun Úniku, hodi simplifika prosesu administrativu ba sidadaun no ba empreza sira, atu nune’e bele promove ambiente negósiu ida ne’ebé efisiente no asesivel liu, liuliu ba empreza ki’ik no média sira. Avansa mós ona reestruturasaun Rejiaun Administrativa Espesiál Oekusi Ambenu (RAEOA) no Zona Espesiál Ekonomia Sosiál Merkadu Timor-Leste (ZEESM). Reforma hirak-ne’e inklui alterasaun ba lejizlasaun atuál no nomeasaun Rogério Tiago de Fátima Lobato nu’udar Prezidente Autoridade RAEOA nian, ho Komisaun Ezekutiva foun ne’ebé dedika ba implementasaun Zona Ekonómika Espesiál ida iha Oekusi Ambenu. 
Iha edukasaun, Governu implementa ona medida lubun ida hodi garante jestaun rekursus umanus ida ne’ebé efisiente, hodi garante kualidade no kontinuidade edukasaun iha Timor-Leste laran tomak. Kria ona bolsa kandidatus hanesan parte ida hosi kompetisaun iha rekrutamentu, hodi permite Ministériu Edukasaun atu aloka lalais rekursus tuir eskola sira-nia nesesidade. Ho aprovasaun Lei Baze Ensinu Superiór nian, Governu reforsa setór ne’e, no introdús Kursu Tékniku-Profisionál Superiór (CTePS, Sigla iha Lian Portugés), uniformiza síklu lisensiatura no mestradu nune’e mós autoriza ensinu distánsia, ne’ebé adapta ho nesesidade modernu ensinu nian. 
Governu mós hahú ona programa hodi kombate malnutrisaun, inklui dezenvolve Planu Nasionál Multisetoriál ba Kombate ‘Stunting’ no akizisaun Ai-han Nutritivu Espesializadu sira. Implementa mós ona kampaña vasinasaun ho eskala boot, inklui vasinasaun hasoru HPV, hodi prevene kankru serviks, no konfirmasaun kona-ba erradikasaun rubéola iha nasaun ne’e, ne'ebé válida hosi Organizasaun Mundiál Saúde (OMS).
Iha saúde, Governu serbisu ona atu loke tan infraestruturas ospitalár no hadi’a kuidadu saúde materna no neonatál. Projetu sira hala'o daudaun hodi harii ospitál foun iha Manufahi, Ermera no Dili, no mós inisiativas hodi garante fornesimentu kontínuu ba ai-moruk sira. Hatán ba ameasa rabia, Governu ho lais implementa medida kontrolu no prevensaun ne’ebé bele hasoru situasaun ne’e, nune’e prevene propagasaun virus iha país ne’e.
Iha setór protesaun sosiál, aumenta valór pensaun defisiénsia no idozu iha rejime naun-kontributivu, no ajusta Programa Bolsa da Mãe atu hatán di’ak liután ba nesesidade família sira-nian. Iha kolaborasaun ho Portugál, asina akordu seguransa sosiál ida ne’ebé fó protesaun no benefísiu ba sidadaun timoroan sira ne’ebé hela iha estranjeiru. Governu mós reforsa apoiu ba direitu labarik sira nian, implementa medidas hodi hadi’a kondisaun moris ema ho defisiénsia sira-nian no estratéjia foun sira hodi tau-matan ba ferik-katuas sira.
Asaun hirak-ne’e hatudu kompromisu Governu nian atu kria rede protesaun sosiál ne’ebé forte liu, hadi’a indikadór saúde no edukasaun no haburas kreximentu ekonómiku inkluzivu. Hodi implementa polítika sira-ne’e, Timor-Leste hametin baze sira ba dezenvolvimentu sustentável, fornese kondisaun moris ne’ebé di’ak liu ba nia populasaun no harii futuru ida ne’ebé reziliente no prósperu liu.
GOVERNASAUN DI’AK, KOMBATE KORRUPSAUN
Governu Konstitusionál IX implementa ona reforma estruturál lubun ida hodi promove jestaun públika ida ne’ebé transparente, efisiente no responsável, aliñadu ho prinsípius governasaun di’ak. Husi inisiativa prinsipál sira ne’e, destaka Reforma Jestaun Finanseira Públika, ne’ebé inklui aprovasaun ba Lei Jestaun Finanseira Públika foun. Diploma ida-ne’e hakarak hadi’a planeamentu orsamentál no reforsa transparénsia, ho kontrolu parlamentár ne’ebé boot liu ba despeza públika no garante katak gastu sira orienta ba rezultadu konkretu ne’ebé fó benefísiu ba populasaun.
Atu kompleta reforma ida-ne’e, aprova ona projetu Dekretu-Lei fundamentál tolu: Kódigu Aprovizionamentu no Kontratu Públiku foun, ne’ebé reforsa transparénsia no introdús regra anti-abuzu; Regulamentu kona-ba Atribuisaun Subsídiu, Subvensaun no Doasaun sira, ne’ebé asegura enkuadramentu rigorozu ida ba atribuisaun apoiu públiku nian; no Regulamentu kona-ba Auditoria Interna, ne’ebé estabelese matadalan ba auditoria independente no imparsiál iha entidades públikas, promove operasaun administrativa kontínuu ne’ébé diák liután.
Iha setór seguransa, Governu introdús reformas abranjentes iha tinan dahuluk mandatu nian, inklui reintegrasaun membrus Polísia Nasionál Timor-Leste (PNTL) no reestruturasaun forsa seguransa sira, ho avaliasaun no ajustamentu kontínuu hodi garante efikásia no prontidaun. Reforma hirak ne’e ho objetivu atu hametin dixiplina no neutralidade forsa seguransa ne’ebé sai hanesan pilár esensiál ba estabilidade no kredibilidade instituisaun nasionál. Entre medida sira ne’ebé adota, maka reintegrasaun polísia PNTL na’in 158 ne’ebé hetan reforma irregulár, aprovasaun ba Estatutu Polísia foun no Orgánika foun PNTL nian. Diploma sira ne’e introdús mudansa signifikativu, inklui reintrodusaun juramentu fidelidade no definisaun kritériu objetivu ba promosaun, ne’ebé reforsa kapasidade resposta instituisaun ne’e nian.
Hatán ba kestaun sira orden públika nian, Governu dekreta ona hodi suspende ensinu, aprendizajen no prátika arte marsiais sira no taka temporáriu ba espasu hotu-hotu ne'ebé dedika ba prátika ida-ne'e. Medida ida-ne’e implementa ho objetivu atu promove pás sosiál, tanba hatudu ona efetivu hodi hamenus konflitu sira ne’ebé relasiona ho atividade arte-marsiál sira. Ho konsiderasaun tomak, Governu planeia atu permite prátika arte marsiál sira iha futuru iha de’it kontestu desportivu, enkoraja ezersísiu ne’ebé saudavel no kontribui ba edukasaun sívika no umanístika foin-sa’e sira-nian.
Atu reforsa integridade no imparsialidade iha forsa defeza no seguransa, hala’o serimónia ida “Kompromisu Ónra Institusionál nian”, iha ne’ebé membru sira kompromete atu sees-an husi organizasaun polítika no grupus artes marsiais. Inisiativa ne’e reforsa dixiplina no neutralidade ne’ebé esensiál ba kredibilidade instituisaun defeza no seguransa nian, hametin konfiansa populasaun no promove estabilidade iha Timor-Leste.
Hatán ba nesesidade atu hametin governasaun lokál no desentralizasaun, Governu kria Servisu Administrasaun Suku, ne’ebé fasilita apoiu diretu ba komunidade sira no asegura ajuda-kustu ba lideransa komunitária sira. Iha tempu hanesan, programa sira hanesan Maundeobra Postu Administrativu no Movimentu Hafoun Aldeia, iha hela reestruturasaun atu hadi'a kualidade moris iha aldeia sira. Planu Estratéjiku ba Munisípiu sira mós hahú ona, akompaña ho implementasaun Balkaun Úniku iha sede munisípiu sira, hodi simplifika asesu ba servisu públiku sira no promove efisiénsia administrativa.
Atu kombate korrupsaun, Kódigu Aprovizionamentu no Kontratu Públiku foun introdús protesaun ba denunsiante sira no reforsa responsabilidade entidade públika sira iha jestaun kontratu. Iha sistema aduaneiru, Komisáriu foun Autoridade Aduaneira, Joanico Pinto, halo kompromisu atu hametin kontrolu fronteira, maximiza kobransa reseita no promove kultura efisiénsia no integridade.
Ho inisiativa sira ne’e, Governu Timor-Leste reafirma ninia kompromisu governasaun di’ak, transparénsia no kombate korrupsaun, nune’e mós seguransa interna, hodi garante ambiente ne’ebé estável no konfiável ba dezenvolvimentu nasaun nian. Asaun sira ne’e kontribui hodi konsolida populasaun nia konfiansa iha instituisaun públika sira, kria baze sólidu ida ba dezenvolvimentu sustentável, pás sosiál no prosperidade iha Timor Leste.
RELASAUN INTERNASIONÁL
Tinan 2024 marka ho vizita istórika husi Sua Santidade Papa Francisco mai Timor-Leste, eventu ne’ebé ema barak rekoñese nu’udar susesu boot ida. Santu Padre rasik hato’o nia agradesimentu ba Primeiru-Ministru, Kay Rala Xanana Gusmão, ba ospitalidade no susesu Viajen Apostólika nian, hodi reforsa knaar Timor-Leste nu’udar nasaun ne’ebé promove diálogu no akollimentu (ne’ebé simu ho di’ak) iha komunidade internasionál.
Dezde inísiu mandatu atuál, Timor-Leste simu ona vizita oioin hosi xefe Estadu no Governu sira, membrus governu estranjeiru no líder organizasaun internasionál koñesidu sira. Husi vizita sira ne’e, destaka vizita Sekretáriu-Jerál Nasoins Unidas, António Guterres, ne’ebé subliña importánsia Timor-Leste nian iha kontestu globál no nia relevánsia ne’ebé buras ba beibeik iha asuntu internasionál sira.
Iha tempu hanesan, nasaun ne’e partisipa ona ho ativu iha enkontru no fórum rejionál sira, liuliu iha ámbitu ASEAN, hodi hatudu ninia kompromisu ba integrasaun rejionál no hametin lasu diplomátiku ho nasaun viziñu sira. Prezensa ativu iha enkontru sira hanesan ne’e permite Timor-Leste koloka-an nu’udar parseiru importante ida iha Sudeste Aziátiku no hametin ninia relasaun polítika no ekonómika iha rejiaun ne’e.
Inisiativas iha relasaun internasionál sira ne’e destaka la’ós de’it tanba relevánsia hosi enkontru no vizita sira, maibé mós tanba benefísius ne’ebé lori ba Timor-Leste. Hametin lasus diplomátiku no habelar kooperasaun ho nasaun belun sira no organizasaun internasionál sira permite nasaun konsolida ninia prezensa globál, atrai investimentus, haburas dezenvolvimentu ekonómiku no promove pás no estabilidade iha rejiaun. Liuhusi esforsu sira ne’e, Timor-Leste hatudu ninia kompromisu ba dezenvolvimentu inkluzivu no ninia determinasaun atu kontribui ba komunidade internasionál, enkuantu hetan rezultadu husi respeitu malu no iha kolaborasaun.
Portavós Governu nian, Ministru Agio Pereira, afirma katak “Governu Konstitusionál IX, liuhusi lideransa Primeiru-Ministru Kay Rala Xanana Gusmão nian, ho firme kompromete atu garante katak timoroan ida-idak hetan benefísiu husi jestaun rekursu públiku ne’ebé iha responsabilidade no polítika sira ne’ebé apoia dezenvolvimentu ba tempu naruk” .
Nia hatutan tan katak “OGE 2025 hatudu vizaun kreximentu ida ne’ebé sustentável, iha ne'ebé investimentu ida-idak la'ós hakarak de'it ba moris-di'ak imediatu, maibé mós atu kria fundasaun sólidu sira ba jerasaun sira aban-bain rua nian. Ita harii Timor-Leste ida ne’ebé prósperu liu, ekuitativu liu no reziliente liu.”
