Governu Aprezenta OGE 2025 ba Parlamentu Nasionál, Foku ba Infraestrutura Estratéjika, Kreximentu Ekonómiku no Moris-Di’ak Sosiál
Governu Konstitusionál IX ohin, loron 6 fulan-novembru 2024, aprezenta iha Parlamentu Nasionál, Proposta Lei Orsamentu Jerál Estadu (OGE) ba tinan 2025, ho tema “Investe iha Infraestruturas Estratéjikas, Reforsa Ekonomia no Hadi’a Sidadaun sira-nia Moris-Di’ak ". Ho totál orsamentu hamutuk dolar amerikanu biliaun 2,617, Governu reafirma ninia kompromisu ho dezenvolvimentu sustentável no hadi’a kondisaun moris timoroan tomak nian. 
Iha ninia intervensaun, Primeiru-Ministru, Kay Rala Xanana Gusmão, subliña katak OGE 2025 ne’e “liu fali kolesaun númeru no alokasaun fundu de’it: ne’e hanesan deklarasaun ho laran hakarak; vizaun ida ho aten-barani tebes ba futuru; no roteiru konkretu ida atu hasoru dezafius no aproveita oportunidades.” Ho proposta ne’e, Governu hakarak atu garante katak sidadaun hotu-hotu, “la haree ba fatin ne’ebé sira hela ka sira-nia pozisaun sosiál”, goza “rezultadu husi kreximentu no dezenvolvimentu”. "Ida-ne'e maka orsamentu ba povu no hosi povu", afirma Primeiru-Ministru.
Refere ba kontestu globál, Kay Rala Xanana Gusmão destaka katak hasoru “inserteza sira ne’ebé nunka akontese antes”, “Governu prepara orsamentu ida ne’ebé konsidera nesesidade povu nian, nune’e mós iha kontestu ida-ne’e kona-ba vulnerabilidade ba fatór esternu sira”, no ne’ebé la foka “de’it ba rekuperasaun imediata, maibé mós hodi harii polítika no medidas reziliente ne’ebé sei permite Timor-Leste atu moris-di’ak iha tempu naruk.”
Primeiru-Ministru destaka importánsia atu investe iha setór produtivu sira, hanesan infraestrutura, edukasaun, saúde, protesaun sosiál no ambientál, no iha setór petrolíferu, no subliña katak “ne’e mak pilar sira ne’ebé sai hanesan baze ba ita hodi harii sosiedade ida ne’ebé próspera no justa”. Entre área prinsipál sira investimentu nian, Primeiru-Ministru destaka reforsa infraestruturas estratéjikas, ho dotasaun dolar millaun 654, hodi subliña katak fundu sira-ne'e “la'ós limitadu ba konstrusaun estrada no ponte sira – fundu ne’e ho objetivu atu liga ita-nia ema sira, hodi fasilita komérsiu no promove oportunidades.”
Xefe Governu destaka mós importánsia husi jestaun sustentável ba rekursu ídriku no protesaun ambientál, liuliu iha área urbana sira. “Governu kompromete ona totál millaun 26 ba inisiativa Bee, Saneamentu no Ijiene iha munisípiu balun, ho foku ba dezenvolvimentu no manutensaun infraestrutura,” nia realsa. Pontu relevante seluk ne’ebé prevee ona iha OJE maka investimentu hodi hadi’a ligasaun internét, ho orsamentu “dolar millaun 2,5 ba projetu instalasaun fibra ótika no dolár millaun 5 ba ninia jestaun”, nune’e mós“ aprovasaun ba lisensa servisu internét nian” ne’ebé tuir Primeiru-Ministru, sei fasilita “hodi hadi’a indikadores ekonómiku no dezenvolvimentu indústria foun sira ne’ebé antes ne’e la posivel atu halo.” 
Proposta orsamentál ne’e mós aloka montante signifikativu ho “dolar millaun 741, ka, 35% hosi orsamentu konsolidadu, ba setór kapitál sosiál”, ho foku ida hodi apoia populasaun sira ne’ebé vulneravel liu no rekoñese sakrifísiu veteranu sira nian. “Hodi atribui dolar millaun 190 ba ita-nia veteranus, ita fó onra ba sira-nia sakrifísiu no rekoñese katak liberdade no pás ne’ebé ita goza ohin loron hetan tanba sira-nia aten-barani”, tenik Kay Rala Xanana Gusmão. Orsamentu ne’e inklui mós “transferénsia dolar millaun 124 ba Seguransa Sosiál” no reforsu ida iha programa Bolsa da Mãe, agora ho montante totál dolar millaun 7 no montante adisionál ida liu dolar millaun 2 ne’ebé aloka ba subsídiu saúde no nutrisaun kondisionál ida ba inan isin rua no labarik sira. Kona-ba saúde, Governu sei aloka besik dolar millaun 92,2 hodi hadi'a asesu ba servisu sira saúde nian iha territóriu tomak, nune’emós investe millaun 14 iha ai-moruk no ekipamentu esensiál sira.
Bainhira aborda kestaun dezenvolvimentu ekonómiku, Primeiru-Ministru subliña apoiu ba setór privadu, liuliu agrikultura no empreza ki’ik no médiu sira, hodi afirma katak “ita hatene katak forsa ekonómika loloos mai hosi laran no ita iha kompromisu atu dezenvolve indústria lokál sira ne’ebé bele hamriik teste tempu nian.” Ba ida-ne'e, aloka ona dolar amerikanu millaun 40,8 hodi promove setór produtivu sira hanesan agrikultura, peska no pekuária, ho objetivu atu “hasa'e produsaun lokál, hamenus dependénsia ba importasaun no promove inovasaun.”
Kona-ba setór petrolíferu no rekursus naturais, Primeiru-Ministru hateten investimentu dolar millaun 40,5, ho adisionál dolar millaun 12 dirije ba dezenvolvimentu projetu Greater Sunrise. “Ita labele lakon atu investe iha rekursu sira ne’ebé natureza disponibiliza ona ba ita atu moris no buras,” nia koa’lia liu tan.
Iha área edukasaun, ne’ebé konsidera husi Kay Rala Xanana Gusmão hanesan “ekualizadór boot”, Orsamentu ne’e prevee dolar millaun 145,8 ba infraestrutura edukativa, formasaun ba professor sira no hadi’a sistema jestaun edukasaun nian, nune’e mós dolar millaun 17,2 ba bolsa estudu.“Ami prepara hela líder jerasaun aban-bain rua nian, inovadór no ajentes mudansa timoroan nian”, nia deklara, hodi hatutan tan katak “susesu hosi ita-nia nasaun tau iha ita-nia joven sira nia kabaas no ami komprometidu atu fó ba sira ferramenta sira ne’ebé sira presiza atu hetan susesu. ”
Primeiru-Ministru reafirma kompromisu Governu nian, liuhosi governasaun di’ak no transparénsia, garante katak Governu sei “asegura fundu públiku sira ne’e sei jere ho transparénsia no responsabilidade másimu.” Nia hateten presiza atu implementa sistema jestaun finanseira públika ne’ebé forte liu, hametin mekanizmu auditoria interna no kombate korrupsaun. “Korrupsaun no administrasaun-ladi’ak laiha fatin iha futuru Timor-Leste nian,” nia realsa.
Ikus liu, Xefe Governu destaka katak “orsamentu ne’e reprezenta pontu virajen ida ba ita-nia Nasaun. Ida-ne'e kona-ba investe iha ita-nia futuru, hodi garante katak Timor-Leste sai hosi dezafiu sira ne'ebé ita hasoru daudaun hanesan nasaun ida ne'ebé forte liu, unidu liu no prósperu liu.”
Primeiru-Ministru hakotu nia diskursu ho apelu ba unidade nasionál, hodi afirma katak “uainhira ita hasoru dezafiu globál no doméstiku sira, ita tenke hanoin katak ita-nia forsa iha ita-nia unidade no reziliénsia” no “hamutuk, ita sei halo buat saida de’it ne’ebé ita bele hodi harii futuru ne’ebá – futuru ida ne’ebé bazeia ba justisa sosiál, estabilidade no konfiansa ba malu.”
Diskusaun no votasaun ba OGE iha jeneralidade sei hala’o to’o loron 8 fulan-novembru, ho análize iha espesialidade no votasaun finál ne’ebé marka ona ba períodu husi loron 11 to’o loron 25 fulan-novembru.
