Governu Timor-Leste

Woodside, Timor GAP nia parseiru iha Sunrise Joint Venture, reafirma ninia postura nakloke kona-ba opsaun dezenvolvimentu ba projetu gás Greater Sunrise, ne’ebé lokaliza maizumenus 140 km ba kosta súl Timor-Leste nian.

Meg O'Neill, Diretora Ezekutiva Woodside, ne'ebé sita hosi plataforma informasaun espesializa iha indústria mina no gás Upstream, rekoñese katak empreza " ne’e la iha konseitu preferidu" ba Greater Sunrise. "Ami nakloke," nia hatutan, hodi destaka katak ami presiza de'it "deskobre saida maka dalan di'ak liu atu avansa ho dezenvolvimentu, tanba ne’e serbisu estudu konseituál nian kontinua hela." 

O’Neill mós destaka katak “estudu konseitu ne’e atu garante katak ema hotu-hotu ne’ebé envolve - empreza joint venture sira, governu Timór-Leste no governu Austrália nian… hotu-hotu serbisu hosi faktu lubun ida ne’ebé hanesan, no depois ita bele uza faktu komún sira-ne’e hodi apoia desizaun ida kona-ba dalan di'ak liu atu dezenvolve ativu ida ne’e.”

 Dezde fulan-abríl, empreza britániku Wood lidera ona estudu konsetuál independente ida ba Greater Sunrise, ho objetivu atu identifika solusaun dezenvolvimentu ne'ebé iha vantajen liu ba parte hotu ne'ebé envolve. Estudu ida-ne'e, prevee sei remata iha tinan nia rohan, avalia opsaun sira enjeñaria, teknolojia, finansiamentu no estrutura komersiál nian, aleinde analiza fatór fiskál, ambientál, saúde no seguransa, no sosioekonómiku nian.

Dezenvolvimentu Greater Sunrise no gazodutu nia to’o ba-iha kosta súl Timor-Leste nian hanesan prioridades nasionál, ne’ebé esensiál ba kreximentu no dezenvolvimentu ekonómiku nasaun nian iha futuru. Governu sei kontinua avalia estratéjia sira ne’ebé di’ak liu hodi dezenvolve projetu ne’e, no garante katak ida-ne’e avansa ho forma sustentável no lori benefísiu signifikativu ba nasaun no rejiaun ne’e.

 Joint venture Greater Sunrise kompostu hosi Timor GAP, ho partisipasaun 56,6%, Woodside, ho 33,44%, no Osaka Gas Australia, ho 10%.