Governu Timor-Leste

Sekretária Estadu Igualdade, Elvina Sousa Carvalho, iha loron 28 fulan-outubru 2024, partisipa iha Kolókiu kona-ba “Programa Hamutuk ba Igualdade”, eventu ne’e hala’o iha Dili ho objetivu atu hametin prátika institusionais kona-ba prevensaun no resposta ba Violénsia Bazeia ba Jéneru (VBJ) iha Timor-Leste. Organizadu iha parseria ho ajénsias Nasoins Unidas – Feto ONU, Organizasaun Internasionál ba Migrasoins (OIM), Programa Nasoins Unidas ba Dezenvolvimentu (PNUD) no Fundu Nasoins Unidas ba Populasaun (UNFPA) – no ho apoiu finanseiru hosi Ajénsia Kooperasaun Internasionál Koreia (KOICA), kolókiu ne’e halibur reprezentantes hosi entidade nasionál no internasionál oioin. 

Objetivu prinsipál husi eventu ne’e mak atu promove fahe koñesimentu hodi motiva kolaborasaun no interkámbiu prátika ne’ebé di’ak liu entre parseiru sira; no haree-liu impaktu sustentável husi intervensaun ne’ebé efetivu, bele sai hanesan modelu ida ba adosaun ne’ebé luan liu; dezenvolve planu asaun sira ne'ebé apoia sustentabilidade ba tempu naruk; no insentiva parte interesada hotu-hotu atu mantein no habelar esforsus institusionais kona-ba prevensaun no resposta ba VBJ.

Durante sesaun ne’e destaka konkista signifikativa ne’ebé Governu, sosiedade sivíl no parseiru dezenvolvimentu sira hetan durante tinan haat ikus ne’e, inklui redusaun 37% iha feto no 23% iha mane ne’ebé justifika violénsia. Konkista sira seluk inklui hatama edukasaun VBJ no saúde seksuál iha kurríkulu eskola sekundária nian, kria sentru apoiu 34 ne'ebé informadu kona-ba trauma ba sobrevivente sira, no hadi'a polítika no prosedimentu operasionál sira hodi garante impaktu ne'ebé dura. Inisiativa sira-ne'e fó benefísiu diretamente ba ema iha totál liu rihun 61 no atinje populasaun liu rihun 300 iha Timor-Leste laran tomak. 

Durante ninia diskursu, Sekretária Estadu Elvina Sousa Carvalho destaka kompromisu Governu nian atu promove ambiente ida seguru no livre husi violénsia ba feto no labarik-feto sira: “Ita hotu servisu hamutuk hodi kombate violénsia hasoru feto no labarik-feto sira iha Timor-Leste. Luta ida-ne'e nia objetivu la'ós de'it atu hetan igualdade jéneru, maibé mós atu harii jerasaun futuru ida ne'ebé livre hosi forma violénsia hotu-hotu,” nia afirma.

 Elvina Sousa Carvalho mós hatutan tan katak “Sekretaria Estadu Igualdade iha nafatin kompromisu atu hametin koordenasaun Komisaun Interministeriál ba implementasaun Planu Asaun Nasionál kona-ba Violénsia Bazeia ba Jéneru, ho reforsu ferramenta monitorizasaun no avaliasaun hodi sukat progresu, identifika lakunas, no hadi’a intervensaun sira iha futuru”.

Koordenadór Rezidente Interinu ONU nian, Arvind Mathur, elojia mós esforsu hamutuk no importánsia hosi edukasaun ida ne'ebé bazeia ba igualdade, hodi hatete katak “integra violénsia bazeia ba jéneru no direitu sira saúde nian iha edukasaun ba ita-nia joven sira hanesan pasu ida ba futuru ida ne'ebé livre hosi violénsia no iha abut iha igualdade.” 

Iha kolókiu ne’e mós partisipa hosi reprezentantes  sosiedade sivíl, Prokuradoria Jerál Repúblika, KOICA, no instituisaun sira seluk ne’ebé servisu hodi prevene violénsia bazeia ba jéneru. Iha eventu ne’e, aprezenta projetus kapasitasaun no inisiativas transformasaun sosiál, husikedas edukasaun saúde seksuál iha eskola sira to’o reforsu ba asesu servisu saúde no justisa ba vítima husi violénsia.

Atu remata, Sekretária Estadu Elvina Sousa Carvalho hato’o nia agradesimentu ba ajénsia ONU no parseiru sira hotu ne’ebé hamutuk, serbisu ba Timor-Leste ida ne’ebé igualitáriu liu no livre husi violénsia.