Governu Timor-Leste

Ministru Prezidénsia Konsellu Ministru, Agio Pereira, ohin, loron 28 fulan-outubru tinan 2024, hasoru malu ho Michael Schiffer, Administradór Asistente Gabinete Ázia nian hosi Ajénsia Estadus Unidus ba Dezenvolvimentu Internasionál (USAID), hodi ko'alia kona-ba projetu sira ne'ebé hala'o hela no esplora áreas kooperasaun entre Timor-Leste no Estadus Unidus. Enkontru ne’e ho objetivu atu ko’alia kona-ba projetu sira ne’ebé la’o hela no identifika área koperasaun foun sira entre Timor-Leste no Estadus Unidus, liuliu iha dezenvolvimentu ekonómiku, ho énfaze ba seguransa alimentár, nutrisaun no prezervasaun ba biodiversidade Timor-Leste nian. 

Enkontru ne’e partisipa mós husi Embaixadora Estadus Unidus Amérika iha Timor-Leste, Donna Welton; Diretór Interinu ba Misaun USAID iha Timor-Leste, Michael Stern; Xefe Estadu-Maiór Eskritóriu Ázia USAID Hailey Becker; Konsultora dezenvolvimentu agríkola USAID Amy Uber; no konsultór jestaun projetu demokrasia no governasaun USAID, Germano Boavida.

Iha enkontru ne’e, Ministru Agio Pereira destaka inisiativas prinsipál hosi Programa Governu nian, ne’ebé foka liu ba setór agríkola, no ninia objetivu mak atu promove dezenvolvimentu rurál no garante seguransa ai-han iha Timor-Leste. 

Hanesan estabelese ona iha ninia programa, Governu Konstitusionál IX liuhusi ninia mandatu hakarak atu hametin setór primáriu nu’udar baze ba dezenvolvimentu ekonómiku no sosiál, liuliu iha área rurál sira, iha-ne’ebé maioria populasaun hela ba. Ho foku espesiál ba seguransa ai-han, redusaun kiak no tranzisaun ba produsaun agríkola ne’ebé emprezariál liu, Governu hakarak implementa asaun sira ne’ebé promove prátika agríkola sustentável sira, hasa’e produtividade no valoriza rekursu naturál nasaun nian, hadi’a moris-di’ak populasaun no promove dezenvolvimentu rurál ne’ebé inkluzivu no sustentável. 

Kolaborasaun ho USAID apoia ona projetu sira ho objetivu atu hasa’e nutrisaun no prezerva biodiversidade lokál, hodi kompleta Governu nia esforsus iha área oioin.