Ministru Administrasaun Estatál partisipa iha Abertura Espozisaun Internasionál Mákinas Agríkolas iha Xina
Ministru Administrasaun Estatál, Tomás do Rosário Cabral, iha loron 26 fulan-outubru tinan 2024, partisipa iha serimónia abertura ba Espozisaun Internasionál Mákinas Agríkolas iha Xina, eventu ida ne'ebé hala’o hosi loron 26 to'o 28 fulan-outubru iha Sentru Internasionál ba Konvensoins no Espozisoins Changsha, iha provínsia Hunan. Konsidera ona hanesan espozisaun boot liu ba setór agríkola iha Ázia no ida entre espozisaun lima boot liu iha mundu, inisiativa ne’e halibur autoridades governamentais no reprezentantes indústria agríkola hosi nasaun 50 resin, hodi promove interkámbiu no kooperasaun internasionál iha ámbitu mekanizasaun agríkola. 
Iha ninia diskursu, Ministru Tomás do Rosário Cabral ko’alia-liu importánsia husi relasoins bilaterais entre Timor-Leste no Xina, ne’ebé foin lalais ne’e hasa’e ba estatutu Parseria Estratéjika Abranjente, tuir “Deklarasaun Konjunta entre Repúblika Populár Xina no Repúblika Demokrátika Timor -Leste kona-ba estabelesimentu Parseria Estratéjiku ida ne’ebé Abranjente”. Ministru afirma mós avansu sira iha kooperasaun entre provínsia Hunan no munisípiu Manatutu, ho projetu konjuntu sira “iha áreas hanesan kultivu -vejetál, dezenvolvimentu ortikultura, hakiak animál no akuakultura”, inisiativa sira ne’ebé ho objetivu atu hasa’e agríkola no kontribui ba seguransa ai-han iha rejiaun ne’e. 
Governante ne’e rekoñese katak Espozisaun Internasionál Mákinas Agríkolas Xina nian, iha ne’ebé “área espozisaun, númeru espozitór no númeru vizitante nian maka boot liu iha istória”, fornese “plataforma ida ne’ebé maka’as ba komunikasaun, interkámbiu no kooperasaun entre nasaun sira iha mundu tomak”. Nia hateten mós katak Timor-Leste haree ho espetativa boot oportunidade kooperasaun ne’ebé eventu ida-ne’e lori hodi “halo inovasaun ba modelu kooperasaun no lori vitalidade foun ba dezenvolvimentu no interkámbiu indústria mákinas agríkolas nian”. 
Iha kontestu ida-ne’e, Ministru Tomás Cabral destaka “inisiativa prinsipál sira hosi Planu Estratéjiku Dezenvolvimentu Nasionál Timor-Leste tinan 2011-2030 nian”, ne’ebé ho objetivu atu “utiliza teknolojia avansadu mákina agríkola hodi hasa’e ita-nia kualidade setór agríkola nasionál nian”, ho objetivu atu “fasilita produtór rurál sira-nia moris, hamenus burokrasia iha sira-nia interasaun ho Estadu no kria kondisoins hodi hasa’e produsaun no produtividade”. 
Ministru mós hato’o ninia “apresiasaun ba apoiu desizivu, parseria, inisiativa no kompromisu husi Governadór Provínsia Hunan nian iha asaun kolaborativu sira ne’ebé ita implementa ona hodi avansa agrikultura no promove dezenvolvimentu Munisípiu Manatutu”, no konklui ho dezeju katak eventu ne’e sei kontribui ba “teknolojia ne’ebé aprezenta ne’e adota hosi parte hotu-hotu ne’ebé iha interese ba bein-komún, hodi kontribui ba futuru ida ne’ebé livre hosi hamlaha no krize ai-han ba abitante hotu-hotu iha mundu”.
Iha eventu ne’e, Ministru Tomás do Rosário Cabral hetan akompañamentu husi Embaixadór Timor-Leste ba Repúblika Populár Xina, Loro Horta, no husi prezidente Autoridade Munisipál Manatutu no Baucau, Luís Inácio Henriques Fernandes no Veneranda Eurico Marques Lemos Martins.
