Governu Timor-Leste

Primeiru-Ministru Kay Rala Xanana Gusmão, prezide lansamentu ba Programa Formasaun, Sertifikasaun no Lisensiamentu Ekipamentu ho Risku Aas, iha serimónia ida ne’ebé hala’o iha Dili iha loron 24 fulan-outubru tinan 2024. Inisiativa ida-ne’e, promove husi Institutu Jestaun Ekipamentu no Apoiu ba Dezenvolvimentu Infraestrutura, Institutu Públiku (IGEADI, I.P), iha parseria ho Licensing.tl, Institutu Seguransa no Apoiu Tékniku (ISAT) no IS Austrália, ho objetivu atu forma no sertifika operadór ba ekipamentu pezadu sira tuir norma internasionál no padraun indústria globál nian. 

Primeiru-Ministru destaka relevánsia hosi programa ida-ne’e ba dezenvolvimentu nasaun nian, hodi elojia kompromisu hosi instituisaun sira ne’ebé envolve ona: “Ita iha hela dalan ba dezenvolvimentu. Maske ita labele halo buat hotu dala ida de’it, inisiativa ida-ne’e hatán ba nesesidade importante ba ita-nia futuru”. “Parabéns ba Ministériu Obras Públikas, IGEADI no Licensing.tl” no mós “ba Forsas Defeza Timor-Leste (F-FDTL) tanba envolve mós iha programa ida-ne’e,” nia dehan.

Kay Rala Xanana Gusmão subliña mós papél F-FDTL nian iha apoiu ba populasaun, reforsa katak forsa armada la’ós de’it ba defeza, maibé mós atu kontribui iha momentu sira ne’ebé presiza. “Programa ida-ne’e fó posibilidade ba ita-nia militár sira hodi tulun povu Timór iha situasaun emerjénsia. Iha kazu inundasaun, hanesan ezemplu, importante tebetebes katak sira preparadu atu atua, ho ekipamentu sira ne’ebé adekuadu no koñesimentu nesesáriu,” nia akresenta. 

Prezidente Konsellu Administrasaun IGEADI, Ana Paula da Cruz, hato’o ninia entuziazmu ho inisiativa ne’e, hodi projeta impaktu pozitivu ne'ebé nia sei lori ba nasaun. “Ita espera lansamentu ida-ne’e marka inísiu husi transformasaun ida ne’ebé kontribui ba dezenvolvimentu sosiál no ekonómiku sustentável Timor-Leste nian. Ha’u fiar katak programa ida-ne’e sei lori benefísiu boot ba setór infraestrutura ita-nia nasaun nian,” nia hateten.

Programa ne’e, estruturadu iha etapa prinsipál tolu - formasaun, sertifikasaun no lisensiamentu -, la'ós de'it atu kapasita operadór sira ekipamentu pezadu nian maibé mós hametin merkadu traballu timoroan nian, hodi asegura katak traballadór sira hetan sertifikasaun ne'ebé mundu rekoñese. “Ho programa ida-ne’e, ami promove hela forsa traballu ida ne’ebé iha abilidade no tuir rekizitu indústria internasionál nian,” Ana Paula da Cruz akresenta.

Licensing.tl, iha kolaborasaun ho ISAT no IS Austrália, lori ba projetu ida-ne’e esperiénsia ida ne’ebé metin iha formasaun téknika no sertifikasaun, ne’ebé akumula durante tinan barak nia-laran iha Timor-Leste no Austrália, ho espesializasaun iha setór sira hanesan konstrusaun sivíl no rekursu enerjétiku - petróleu, gás no minerais. Licensing.tl ne’e iha tiha ona iha Timor-Leste husikedas tinan 2010, ne’ebé halo operasaun ba baze lokál ida hodi fó apoiu ba ninia atividades. Licensing.tl iha baze operasaun lokál ida iha nasaun ne’e. 

Durante eventu ne’e, halo ona demonstrasaun prátika ida kona-ba operasaun ekipamentu pezadu sira husi funsionáriu IGEADI no membru F-FDTL sira.

Lansamentu ne’e partisipa husi entidade oin-oin, inklui Xefe Estadu-Maiór Jenerál F-FDTL, Tenente Jenerál Falur Rate Laek, Embaixadór Japaun iha Timor-Leste, Tetsuya Kimura, no  mós membrus Governu, parseirus dezenvolvimentu no Polísia Nasionál Timor-Leste (PNTL).