Governu Timor-Leste

Governu, liuhosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha loron 22 fulan-outubru, anunsia kona-ba realizasaun Fórum Investimentu Turizmu Timor-Leste 2024, ne’ebé sei hala’o iha loron 21 no 22 fulan-novembru, tinan 2024, iha Sentru Konvensaun Dili (CCD, sigla iha lian portugés). Eventu ne’e ho objetivu atu foka-liu ba nasaun ne’e nia potensiál turizmu ne’ebé luan tebes no atrai investimentu lokál no internasionál hodi dezenvolve setór estratéjiku ida-ne’e. 

Forum Investimentu Turizmu ne’e sei funsiona nu’udar plataforma ida hodi halibur lider indústria, investidór no reprezentante governamentál sira no setór privadu, ne’ebé inklui parseiru sira iha rejiaun ASEAN nian, hodi diskute oportunidade sira ba kreximentu no kolaborasaun iha área turizmu. Eventu ne’e, sei realiza kada tinan, ho objetivu atu tau Timor-Leste nu’udar destinu turístiku ida ne’ebé emerjente no promisor iha rejiaun.

“Liuhosi parseria estratéjika no prátika investimentu ne’ebé responsavel, ita sei deskobre potensiál estraordináriu husi indústria turístika iha Timor-Leste, ho objetivu atu kria futuru ida ne’ebé sustentável ba ita-nia país no promove oportunidade úniku no espesiál ba ita-nia investidór lokál no ba asuntu internasionál sira”, haktuir Vise-Primeiru-Ministru durante konferénsia imprensa. 

Aleinde palestra husi espesialista no diskusaun painél sira, eventu ne'e sei inklui sesaun sira rede nian, espozisaun komersiál no vizita  guiada ba fatin turístiku sira iha Dili, hodi fó ba partisipante sira vizaun boot ida kona-ba oportunidade sira no potensiál kreximentu setór nian. Entre tema prinsipál sira ne'ebé sei debate maka tendénsia globál sira iha turizmu, parseria públiku-privadu no insentivu sira ba investidór estranjeiru, tantu estranjeiru nune’e mós lokál sira.

Atu bele fasilita prosesu inskrisaun no fó informasaun ne’ebé detalladu kona-ba eventu ne’e lansa ona website ofisiál kona-ba Forum Investimentu Turizmu: www.TLTourismForum.com. Plataforma ne’e permite rejistu husi partisipante no oradór sira, aleinde fó informasaun sira kona-ba ajenda ba eventu ne’e, perfíl oradór sira nian no atualizasaun konstante kona-ba atividade sira ne’ebé programadu ona. 

Forum ba loron rua ne’e, hanesan inisiativa ida husi Governu Timor-Leste atu atrai investimentu foun sira iha setór turizmu, hodi promove país ne’e nu’udar destinu ida ho oferta ida ne’ebé diversifikadu ne’ebé inklui ekoturizmu, luku, observasaun ba baleia sira, trekking, no turizmu kulturál no istóriku. Hein katak partisipasaun hosi ema kuaze na'in 300, inklui emprezáriu no investidór nasionál no internasionál sira, inklui rejiaun ASEAN, nune’e mós asosiasaun setór turizmu nian no parseiru sira dezenvolvimentu nian. 

Eventu ne’e konta ho apoiu hosi entidade oioin, inklui Ministériu Turizmu no Ambiente, TradeInvest Timor-Leste, Autoridade Nasionál Turizmu, no kolaborasaun hosi Korporasaun Finanseira Internasionál (IFC), parte hosi Grupu Banku Mundiál.

Ba informasaun seluk no atu halo inskrisaun, vizita www.TLTourismForum.com