Governu Timor-Leste

Delegasaun ida hosi Ministériu Administrasaun Estatál, ne’ebé lidera hosi Sekretáriu Estadu Dezenvolvimentu Lokál, Mateus W. dos Santos Tallo, hala'o vizita traballu ida ba provínsia Hunan, Xina, hosi loron 7 to'o 11 fulan-outubru tinan 2024, bazeia ba konvite husi Governadór provínsia Xineza, Mao Weiming. Delegasaun ne’e kompostu mós husi prezidente Autoridade Munisipál Ainaro, Baucau, Covalima, Manatuto, Manufahi no Viqueque, ho objetivu atu hametin  kooperasaun iha setór agríkola no esplora oportunidade foun ba dezenvolvimentu  munisípiu sira iha Timor-Leste. 

 Vizita ne’e, hala’o durante loron lima nia-laran, ho objetivu la’ós de’it atu reforsa akordu kooperasaun ne’ebé eziste ona durante tinan sanulu resin entre provínsia Hunan no munisípiu Manatuto, maibé mós atu loke dalan ba troka koñesimentu no esperiénsia sira ho munisípiu sira seluk iha timór, atu nune’e bele promove aumentu produsaun agríkola no kontribui ba dezenvolvimentu ekonómiku sustentável nasaun nian. 

 Hafoin omenajen ida ne'ebé hala'o iha loron dahuluk iha rezidénsia antigu Mao Zedong nian no iha monumentu iha nia onra, delegasaun dedika loron daruak hodi ba vizita Akademia Siénsia Agríkola Hunan nian, sentru internasionál ida ne’ebé rekoñesidu, no hetan akreditasaun hosi Nasoins Unidas ba Ai-han no Agrikultura (FAO). Iha vizita ne’e, membru delegasaun sira bele vizita fasilidade teknolojia modernu no sentru peskiza hare íbridu, iha ne’ebé sira akompaña besik liután etapa kolleta hare no prosesamentu sai fós. 

Iha loron datoluk, delegasaun  vizita Sentru Produsaun no Kooperativa Ai-horis, iha ne’ebé hatudu utilizasaun ekipamentu avansadu ba protesaun no kultivasaun ai-horis no ai-fuan sira. Delegasaun ne’e mós vizita aldeia lokál ida hodi observa ho besik integrasaun dezenvolvimentu agríkola ho inisiativa turizmu no kulturál, aleinde asiste prosesu mekanizadu kolleta hare, ho teknolojia ne’ebé permite kolleta hare 39.960 m² iha de’it minutu sanulu nia-laran. 

Ajenda loron dahaat nian inklui vizita ida ba Zoomlion, empreza ida ne'ebé boot liu iha mundu ne'ebé prodús mákina agríkola no konstrusaun nian. Durante vizita ne’e, delegasaun akompaña prosesu fabrikasaun ekipamentu sira hanesan tratór no mákina ko’a hare no subliña importánsia uza teknolojia avansadu ba modernizasaun setór agrikultura nasionál. Iha loron hanesan, delegasaun ne’e simu hosi Governadór Hunan, Mao Weiming, ne’ebé fahe esperiénsia kona-ba dezenvolvimentu agrikultura moderna no revitalizasaun rurál, hodi reforsa kompromisu atu hametin kooperasaun entre Hunan no Timor-Leste. 

 Iha loron ikus vizita nian, delegasaun dezloka ba iha Laboratóriu Guansan, iha ne’ebé sira vizita salaun espozisaun fini no diskute kona-ba posibilidade atu kria laboratóriu ida ne’ebé hanesan iha Timor-Leste hodi análize, armazenamentu no esportasaun fini.