Governu Timor-Leste

Governu reafirma ninia kompromisu atu adere ba ASEAN iha tinan 2025, hodi destaka esforsu kooperasaun kontínua ho Repúblika Indonézia iha formasaun rekursu umanu, liuliu iha área komérsiu no indústria. Desizaun atu sai membru ASEAN nian iha tinan 2025 hetan konfirmasaun hosi Konsellu Ministru, no parseria internasionál sira, hanesan ida ne’ebé dezenvolve hela ho Indonézia, hanesan pilar importante ida iha prosesu ne’e. 

Nu’udar demonstrasaun ba kompromisu ne’e, Ministru Komérsiu no Indústria Timor-Leste nian, Nino Pereira, hasoru malu iha loron 2 fulan-agostu tinan 2024, iha Jakarta, ho nia omólogu indonéziu, Ministru Zulkifli Hasan. Iha sorumutu ne’e ko’alia kona-ba tópiku esensiál sira ba hametin relasaun komersiál no formasaun profisionál nasionál sira. 

“Governu Repúblika Indonézia konkorda atu kontinua fó formasaun ba ofisiál timoroan sira iha negosiasaun komersiál no sei apoia Timor-Leste iha nia adezaun ba ASEAN iha tinan 2025. Adisionalmente, ami diskute kestaun komérsiu entre nasaun rua ne’e, ho énfaze ba ekilíbriu esportasaun no importasaun,” dehan ministru Nino Pereira. 

Tuir Ministru, enkontru ne’e destaka dezeju konjuntu atu hametin kapasidade téknika traballadór timoroan sira nian, liuliu iha área negosiasaun komersiál nian, aliña ho prosedimentu no regulamentu Komunidade Ekonómika ASEAN nian. Nia destaka mós importánsia atu fó formasaun ba tékniku timoroan sira ho abilidade ne’ebé robustu ne’ebé kontribui ba dezenvolvimentu ekonómiku sustentável nasaun nian.

Ministru Zulkifli Hasan hato’o intensaun atu konsolida kooperasaun ida ne’e ho vizita ida iha futuru mai Timor-Leste, hodi hatudu apoiu kontínuu ba hametin kapasidade sira no hametin relasaun bilaterál sira.

Enkontru entre Ministru na’in rua ne’e la limita de’it ba formasaun no negosiasaun komersiál, sira mós ko’alia kona-ba harmonizasaun polítika esportasaun no importasaun, subliña balansu iha komérsiu bilaterál, no produtu potensiál sira husi Timor-Leste ne’ebé bele mós importa ba ba Indonézia.