Governu Timor-Leste

Durante ninia vizita ofisiál foin lalais ne’e ba Portugál, Primeiru-Ministru, Kay Rala Xanana Gusmão, lansa obra literária foun rua iha sede Komunidade País Lian Portugés (CPLP-sigla iha lian portugés), iha Lizboa. Livru sira, ho títulu “Dalan ba Dame – Caminhos para a Paz” no “Mauberíadas”, ne’ebé publika hosi Porto Editora no aprezenta iha auditóriu CPLP nian iha loron 17 fulan-outubru, hafoin sesaun solene ida iha ne’ebé Xanana Gusmão simu hosi Sekretáriu Ezekutivu, Zacarias da Costa, no husi Reprezentante Permanente Estadu-Membru sira CPLP nian. 

Aprezentasaun hosi livru sira ne'e dirije hosi Luís Amado, eis-Ministru Negósius Estranjeirus Portugal nian, ne'ebé destaka importánsia hosi obra sira hodi kompriende hanoin no trajetória polítika Xanana Gusmão nian.

Livru “Dalan ba Dame – Caminhos para a Paz” nu’udar koletánea hosi diskursu sira ne’ebé hato’o hosi Kay Rala Xanana Gusmão hosi tinan 2012 to’o 2022, ne’ebé ko’alia kona-ba momentu importante sira hosi ninia lideransa iha dékada daruak hafoin Timor-Leste nia independénsia. Livru ida-ne’e destaka ninia vizaun estratéjiku no kompromisu ne’ebé la nakdoko ba dezenvolvimentu no moris-di’ak povu timoroan nian, hodi kobre tema sira hanesan dame, rekonsiliasaun, mudansa klimátika no seguransa rejionál. Aleinde nia diskursu sira nu'udar Primeiru-Ministru, livru ida-ne’e inklui mós intervensaun sira nu'udar Xefe Ekipa Negosiasaun Fronteira Marítima Timor-Leste nian, hanesan Pesoa Eminente hosi organizasaun intergovernamentál g7+ no Reprezentante Espesiál ba Ekonomia Azul. Obra ida-ne'e mós disponivel iha lian Inglés. 

“Mauberíadas” refere ba poema ida ne’ebé hakerek husi José Alexandre Gusmão, Primeiru-Ministru nia naran moris nian, ne’ebé reflete omenajen ida ne’ebé kle’an ba povu Maubere, ne’ebé kompoin bainhira autór sei joven jornalista no hakerek ho regulár artigu sira iha semanáriu “A Voz de Timor”. Poezia ida-ne’e, publika ba dala uluk iha tinan 1975, espresa forsa, reziliénsia no espíritu timoroan sira-nian ne’ebé labele naksobu, no ko’alia mós tensaun polítika no sosiál sira iha períodu ne’ebá. Iha prefásiu, José Ramos-Horta subliña impaktu istóriku no emosionál hosi poema ne’e, hodi destaka oinsá poema ne’e ilustra ligasaun entre espresaun poétika Xanana nian no ninia kompromisu polítiku, ne’ebé nafatin sentradu iha soberania no dezenvolvimentu ninia país nian. Iha edisaun ne’e inklui mós entrevista ida ho autór no testu sira seluk ne’ebé molok ne’e publika ona iha semanáriu “A Voz de Timor”. 

Eventu lansamentu ne’e halo parte iha  vizita ofisiál Primeiru-Ministru nian ba Portugál, ne’ebé hala’o hosi loron 12 to’o 18 fulan-outubru, iha ne’ebé asina ona akordu estratéjiku sira kooperasaun nian no reforsa relasaun bilaterál entre nasaun rua ne’e.