Governu hala’o sorumutu ho Komisoins Parlamentu Nasionál hodi hahú audiénsia públika ba avaliasaun OJE 2025
Parlamentu Nasionál ohin hahú siklu audiénsia públika ida ne’ebé promove hosi Komisaun Espesializada Permanente sira, hodi dedika ba apresiasaun Proposta Lei Orsamentu Jerál Estadu (OJE) ba tinan finanseiru 2025. Audiénsia sira ne’e, sei hala’o to’o loron 25 fulan-outubru, sei konta ho partisipasaun husi membru Governu, Prezidénsia Repúblika no dirijente Administrasaun Públika sira, hodi debate no klarifika orsamentu setoriál sira ba tinan oin. 
Proposta Lei OJE ba tinan 2025, ho totál dolar amerikanu millaun rihun 2,6, fahe millaun rihun 2,07 ba Administrasaun Sentrál, millaun 62 ba Rejiaun Administrativa Espesiál Oe-Cusse Ambenu (RAEOA) no millaun 482 ba Seguransa Sosiál, inklui Fundu Rezerva Seguransa Sosiál nian.
Iha loron 16 no 17 fulan outubru liubá, Governu partisipa iha Semináriu Panorama Orsamentál ba tinan 2025, ne’ebé organiza husi Komisaun C Parlamentu Nasionál, ne’ebé trata asuntu Finansas Públikas. Semináriu ida-ne'e sai hanesan plataforma ida ba aprezentasaun matadalan sira no prioridade prinsipál OJE 2025 nian, hodi estabelese baze ba audiénsia públika sira ne'ebé daudaun ne’e hala'o hela.
Sesaun plenária sira ba diskusaun kona-ba Proposta Lei OJE 2025 nian sei hahú ho diskusaun no votasaun iha jeneralidade, ne'ebé marka ona ba loron 6 to'o 8 fulan-novembru. Hahú hosi loron 11 fulan-novembru, sei hala'o diskusaun no votasaun ba espesialidade, ho votasaun finál globál ne'ebé prevee ba loron 25 fulan-novembru. Redasaun finál hosi dokumentu ne'e sei submete ba Prezidente Repúblika to'o loron 27 fulan-novembru tinan 2024.
OJE tinan 2025 kontinua ho estratéjia implementasaun ba prioridade sira ne’ebé prevee ona iha Programa Governu nian, ho lema “Investimentu iha infraestrutura estratéjika, hametin ekonomia no hadi’a moris-di’ak sidadaun sira-nian”. Proposta ne’e formula bazeia ba Objetivu Estratéjiku sira husi Governu Konstitusionál da-9 nian, ho objetivu atu promove dezenvolvimentu sósiu-ekonómiku Nasaun nian liuhusi investimentu sira ne’ebé foka ba infraestrutura estratéjika, reforsu ekonómiku no inisiativa sira ne’ebé hakarak atu hadi’a moris-di’ak sidadaun sira-nian. Objetivu hosi OJE tinan 2025 ne’e maka atu promove dezenvolvimentu ekonómiku no hadi’a kondisaun moris populasaun timoroan nian, liuhosi estratéjia ida ne’ebé klaru ne’ebé foka ba kreximentu ekonómiku ne’ebé sustentável, hadi’a servisu públiku no garante katak benefísiu sira hosi dezenvolvimentu ne’e to’o ba sidadaun hotu-hotu.
