Governu Timor-Leste

 Ministru Justisa, Sérgio de Jesus Fernandes da Costa Hornai, iha loron 15 fulan-outubru tinan 2024, hasoru malu ho ninia omóloga Portugeza, Rita Alarcão Júdice, atu hakle’an kooperasaun bilaterál entre Ministériu Justisa país rua-ne’e nian. Sorumutu ida-ne’e fó kontinuasaun ba esforsu hamutuk  ne’ebé hahú tiha ona iha sorumutu anteriór sira, ne’ebé ho objetivu atu fahe koñesimentu no atu hametin kapasidade institusionál iha área formasaun judisiál, investigasaun kriminál no rejistu no notariadu. 

 Iha sorumutu ne’e, diskute ona forma asisténsia téknika no kooperasaun, oioin, ho objetivu atu hametin formasaun ba majistradu, defensór públiku, prokuradór no juíz sira.  Parseria ne’e ho objetivu atu fó programa kapasitasaun teórika, prátika no estájiu, ne’ebé benefisia ba graduadu iha Kursu VII no futuru partisipante sira iha kursu VIII, ne’ebé sei hahú iha tinan 2025.

 Kolaborasaun téknika mós sei estende ba Polísia Sientífika no Investigasaun Kriminál (PSIK), ho disponibilidade atu haruka peritu investigasaun kriminál no laboratóriu sientífiku Polísia Judisiária nian, ho objetivu atu hasa’e kapasidade rekursus umanus no hametin asisténsia téknika iha área ida-ne’e. 

 Iha parte rejistu no notariadu nian, aborda ona prestasaun asisténsia téknika no administrativa husi Institutu Rejistu no Notariadu (IRN) no husi Diresaun-Jerál Servisu Rejistu no Notariadu (DGSRN). Kooperasaun ne’e sei foka liu ba inspesaun no avaliasaun ba servisu prediál no dijitalizasaun ba sistema baze dadus, ho objetivu atu hasa’e efisiénsia servisu rejistu no notariadu nian iha Timor-Leste.

  Ministru Justisa Timor-Leste, Sérgio de Jesus Fernandes da Costa Hornai, iha Lisboa no akompaña Primeiru Ministru, Kay Rala Xanana Gusmão, iha ninia vizita ofisiál ba Portugál. Iha loron 14 fulan-outubru, asina ona Planu Estratéjiku Kooperasaun entre país rua ba períodu tinan 2024 -2028, ne’ebé inklui, entre ninia komponente sira, hametin kooperasaun iha setór justisa. 

 Atu fó hanoin de’it katak Ministra Justisa Portugál, Rita Alarcão Júdice, hala’o ona vizita ofisiál ida mai Timor-Leste iha fulan-juñu tinan 2024 liubá, ho objetivu atu hametin kooperasaun bilaterál, liuliu iha ámbitu reforma iha setór justisa.