Governu Timor-Leste

Governu ne’ebé reprezenta hosi nia membru balun, partisipa hela iha Semináriu Panorama Orsamentál ba tinan fiskál 2025, ne’ebé organiza hosi Komisaun C Parlamentu Nasionál, responsável ba Asuntu Finansas Públikas. Semináriu, ne'e hala’o iha loron 16 no 17 fulan-outubru tinan 2024, iha Resort Alma do Mar, Munisípiu Likisá, ho objetivu prinsipál atu promove transparénsia no diálogu entre interveniente nasionál no internasionál oioin ne'ebé envolve iha prosesu orsamentál. 

Durante loron rua semináriu ne’e, membrus Governu aprezenta orientasaun prinsipál sira hosi Proposta Orsamentu Jerál Estadu (OJE) ba tinan 2025, ne’ebé hetan aprovasaun hosi Konsellu Ministru no submete ona ba Parlamentu Nasionál iha inísiu fulan-outubru. Hamutuk ho membrus Parlamentu Nasionál, no ofisiál sira husi Tribunál Rekursu, Banku Sentrál, Programa Nasoins Unidas ba Dezenvolvimentu (PNUD) no ONG La’o Hamutuk, sira diskute kona-ba tópiku fundamentál relasiona ho panorama orsamentál, dezenvolvimentu makroekonómiku no dezafiu estratéjiku sira ba tinan fiskál 2025. 

 Iha sesaun abertura ne’e hetan intervensaun husi Prezidente Parlamentu Nasionál interina, Deputada Maria Terezinha da Silva Viegas, no Prezidente Komisaun C, Deputada Cedelizia Faria dos Santos, ne’ebé destaka katak semináriu ne’e nia objetivu prinsipál mak atu promove transparénsia liuhosi diálogu, fahe informasaun kona-ba makroekonomia, analiza planu asaun anuál Governu IX nian no Planu Dezenvolvimentu Nasionál, hatene impaktu fatór globál ba dezenvolvimentu Timor-Leste, diskute planu investimentu no rekursu naturais nasaun nian, nune’e mós fahe análize juríka hosi Tribunál Rekursu no pontu de vista husi ONG La'o Hamutuk.

 Proposta Lei OJE ba tinan 2025, ho valór totál dolar amerikanu biliaun 2,6, reflete prioridade estratéjika sira hosi Governu Konstitusionál IX, ho énfaze ba investimentu iha infraestrutura estratéjika sira, reforsa ekonomia nasionál no hadi’a kondisaun moris populasaun nian. Durante semináriu ne’e, analiza ona komponente oioin hosi OJE, ho énfaze partikulár ba impaktu hosi polítika públika iha setór saúde, edukasaun, seguransa sosiál, infraestrutura no dezenvolvimentu ekonómiku sustentável. 

Eventu ida ne’e, sei hahú ho audiénsia públika sira ne’ebé marka ona ba loron 21 to’o 25 fulan-Outubru, ne’ebé sei konvida membrus Governu, Prezidénsia Repúblika no dirijente sira Administrasaun Públika nian hodi diskute no esklarese dotasaun orsamentál ba setór ida-idak. Debate jeneralidade iha Parlamentu Nasionál sei hahú iha loron 06 fulan-novembru, tuir kalendáriu ne’ebé define ona antes, ho objetivu ba votasaun finál ba OJE 2025 iha fin fulan-novembru nian.