Serimónia Bensaun Kulturál ba Tratór
Ministru Agrikultura no Peska, Mariano Assanami Sabino, hamutuk ho lia nain sira hosi sub-distritu lima iha distritu Lautem, hala’o serimónia bensaun kulturál ba hand tratór hamutuk 45 ne’ebé entrega ba grupu agrikultór sira iha eis Merkadu Lama (Central-Lospalos).
Objetivu hosi serimónia ne’e atu agrikultór sira bele utiliza tratór sira ne’e ho efisiésia no efikáz, atu nune’e bele atinji ninia objetivu.
“Serimónia ne’e importante tanba ita haree hosi ita rasik mai hosi lisan no tradisaun fiar ba Maromak, no ita nia lulik sira, entaun ita hakarak husik brigade ida ne’e ho lisan ho tradisaun no atu proteze rai ida ne’e ita presija rai tetuk ne’e ita tenke hakfilak ba rai produtivu agrikola nian no mós tau materiál sira ne’e atu ita hotu hakas-an servisu no hametin ita nia ukun rasik an no liuliu mós setór aihan ita tenke hametin ita nia aihan rasik”.
Iha okaziaun ne’e Mariano Sabino hateten, agrikultura sai setór ne’ebé iha prioridade tanba povu maioria moris nu’udar agrikultór. Setór ne’e ba ekonomia importante tanba durante ne’e ita depende ba osan mina nian dei’t, maibé aban bainrua mina ne’e sei hotu karik, mak ita la transforma setór ne’e ba ekonomia popular, ne’ebé inan-aman mak kaer no fa’an ne’ebé bele fó benefisiu, karik ita la to’o ida ne’e ita sei depende nafatin ba mina.
Hatutan mós kata iha planu setór tolu ne’ebé importante hanesan mudansa funsionáriu agrikultura hodi servi ho efetivu no efisiente no besik povu, dezenvolvimentu ba povu agrikultura (ne’ebé iha faze tolu mak tane agrikultór, agrikultór hiit-an rasik no agrikultór sustentável) no dezenvolvimentu produtu agrikultura.
Hafoin serimónia ne’e Ministru Agrikultura no Peska hala’o mós vizita ba sentru manutensaun tratór no kolam ikan iha Motolori, Lospalos.
