Primeiru Ministru Partisipa iha Semináriu “Diálogu, Verdade no Rekonsiliasaun hanesan meius atu Sustenta Pás: Esperiénsia husi G7+ iha Semana Pás Jenebra nian
Primeiru Ministru, Kay Rala Xanana Gusmão, liuhusi mensajem ne’ebé grava iha vídeo, partisipa iha semináriu ho títulu “Diálogu, Verdade no Rekonsiliasaun hanesan Meiu atu Sustenta Pás: Esperiénsia husi g7+”, ne’ebé hala’o iha loron 15 fulan-outubru tinan 2024, durante edisaun 11 semana pás nian iha Jenebra. Eventu ne’e, organiza husi Sekretariadu g7+, Misaun Permanente Timor-Leste no Serra Leoa iha Jenebra no husi Departementu Federál Negósiu Estranjeiru Suisa nian, ne’ebé haree liu importánsia atu promove dame liuhusi diálogu no rekonsiliasaun iha país sira ne’ebé afetadu husi konflitus. 
Iha ninia diskursu, Primeiru-Ministru Kay Rala Xanana Gusmão subliña importánsia husi prosesu rekonsiliasaun hodi harii Estadu soberanu no pasífiku. Ita labele harii país ida uainhira ita la iha dame ho ita-nia inimigu no ho sira ne’ebé halo ona sala mai ita. Ita hatene katak pasu dahuluk hodi harii Estadu maka rekonsiliasaun”, nia afirma, iha tempu hanesan mós fahe esperiénsia no lisaun valioza Timor-Leste nian ne’ebé bele sai ezemplu ba nasaun sira-seluk iha situasaun hanesan. 
Xefe Adjunta Divizaun Pás no Direitu Umanus Suisa nian Christine Löw maka sai moderadora ba Semináriu ne’e, no konta ho partisipasaun husi oradór destakadu sira, inklui Helder da Costa, Sekretáriu Jerál g7+, ne’ebé aprezenta inisiativas grupu nian atu promove rezolusaun pasífika iha país membru sira. Helder da Costa mós ko’alia liu katak “dame la’os de’it aspirasaun ida, maibé realidade ida ne’ebé kleur ona ita-hein no valoriza tebes husi ninia povu”, no apela solidariedade no kooperasaun hanesan prinsípiu esensiál hodi alkansa dame no estabilidade forte iha rejiaun sira ne’ebé vulneravel liu iha mundu. 
Entre membrus paínel sira seluk, inklui mós Lurdes Bessa, Embaixadora Timor-Leste iha Jenebra, Samuel Saffa, reprezentante permanente adjuntu Serra Leoa, Bernard Duhaime, Relatór Espesiál ONU ba Verdade, Justisa no Rekonsiliasaun no Richard Bennett, Relatór Espesiál ba Direitu Umanus iha Afganistaun. Sira hotu subliña importánsia husi verdade, rekonsiliasaun no responsabilizasaun hanesan pilár fundamentál hodi harii pás sustentavel. 
Sekretáriadu g7+ mós hasoru malu ho Departementu Federál Negósiu Estranjeiru iha Suisa no Organizasaun Mundiál Komérsiu (OMK) hodi diskute kooperasaun hodi promove pás no dezenvolvimentu sustentavel iha país g7+.
