Sekretaria Estadu Igualdade Lidera Atividade hodi promove Igualdade Jéneru no Empoderamentu Feto
Sekretaria Estadu Igualdade, ne’ebé lidera husi Elvina Sousa Carvalho, realiza atividade oioin durante semana ikus ne’e hodi promove igualdade jéneru no empoderamentu feto iha Timor-Leste. Asaun sira inklui selebrasaun Loron Internasionál ba Labarik-Feto, iha loron 11 fulan-outubru, no Loron Internasionál Feto Rurál, iha loron 15 fulan-outubru, aleinde ne’e, eventu seluk hanesan Semináriu kona-ba Orsamentu Sensivel ba Jéneru, Kongresu III hosi Asosiasaun Feto ba Dezenvolvimentu Manufahi no Workshop Sensibilizasaun kona-ba Lei Desentralizasaun no Governu Lokál, ne’ebé ho objetivu atu reforsa partisipasaun polítika no direitu feto sira nian. 
Iha loron 15 fulan-outubru, Elvina Sousa Carvalho marka prezensa iha selebrasaun Loron Internasionál Feto Rurál, ne’ebé hala’o iha Postu Administrativu Barique, Munisípiu Manatutu. Eventu ne’e, ho tema “Reforsa Ekonomia Rurál, hodi Kontribui ba Sustentabilidade Dezenvolvimentu Lokál”, nia subliña papél esensiál feto rurál sira nian iha seguransa ai-han no dezenvolvimentu iha sira-nia komunidade. Sekretária Estadu ne’e subliña importante atu garante katak feto rurál sira iha asesu ba oportunidade no rekursu sira ne’ebé promove sira-nia autonomia no moris-di’ak. 
Iha loron 11 fulan-outubru, Elvina Sousa Carvalho mós partisipa iha selebrasaun Loron Internasionál Labarik-Feto nian, ne’ebé organiza husi PLAN Timor-Leste iha Salaun Multiuzu GMN, iha Dili. Ho tema “Hamutuk ba Pás”, eventu ne’e ho objetivu atu reforsa papél labarik-feto sira-nian no sira-nia partisipasaun ativu iha sosiedade. Sekretária Estadu afirma: “Fundamentál tebes atu reforsa labarik-feto sira-nia lian, hodi promove sira-nia papél iha lideransa no harii futuru ida ne’ebé hanesan liu iha Timor-Leste.” Eventu ne’e marka prezensa husi autoridade nasionál oioin no parseiru dezenvolvimentu sira. 
Iha loron hanesan, Sekretária Estadu ne’e halo parte iha Semináriu kona-ba Orsamentasaun Sensivel ba Jéneru, ne’ebé hala’o hamutuk ho Feto ONU, Programa Nasoins Unidas ba Dezenvolvimentu no Parlamentu Nasionál. Semináriu ne’e halibur lider parlamentár sira hodi foka liu ba integrasaun perspetiva jéneru iha prosesu orsamentál. Elvina Sousa Carvalho destaka relevánsia hosi abordajen ida-ne’e, hodi hateten katak “orsamentasaun sensivel ba jéneru ne’e permite polítika públika sira atu responde ho efikás liu ba nesesidade feto sira-nian no grupu vulneravel sira seluk, hodi promove sosiedade ida ne’ebé ekuitativa liu.” 
Iha loron 10 fulan-outubru, Elvina Sousa Carvalho partisipa iha Kongresu III hosi Asosiasaun Feto ba Dezenvolvimentu Manufahi (AFMADDEM), iha ne’ebé eleitu lideransa foun feto iha munisípiu Manufahi. Iha nia diskursu, Sekretária Estadu destaka serbisu importante asosiasaun nian iha apoiu ba feto lokál sira no reafirma Sekretária Estadu nia kompromisu atu kontinua kolabora ho asosiasaun sira hodi promove dezenvolvimentu sosiál no ekonómiku iha Timor-Leste. 
Iha loron 14 fulan-outubru, Sekretaria Estadu Igualdade, serbisu hamutuk ho Feto ONU Timor-Leste, realiza sorumutu ida iha Timor Plaza hodi valida indikadór prioridade no ferramenta rekolla dadus husi Planu Asaun Nasionál hasoru Violénsia Bazeia ba Jéneru (PAN-VBG). Sorumutu ne’e hetan partisipasaun husi ministériu, organizasaun sosiedade sivíl no parseiru dezenvolvimentu sira, hodi foka-liu ba pilár Prevensaun, Servisu Esensiál sira no Asesu ba Justisa. Serbisu ne’e rezulta aprovasaun ba indikadór-pilotu no kestionáriu sira, hametin kompromisu koletivu hodi kombate violénsia bazeia ba jéneru iha Timor-Leste. 
Ikusliu, iha loron 15 fulan-outubru tinan 2024, Diretora Nasionál Planeamentu no Jestaun Estratéjiku SEI nian, Maria Eusébia Soares Delima, loke Workshop Sensibilizasaun kona-ba Lei Desentralizasaun no Governu Lokál, ne'ebé dirije ba feto partidu polítiku sira ho reprezentasaun parlamentár. Eventu ne’e hala’o iha Salaun Delta Nova, Dili, ho objetivu atu hasa’e partisipante sira-nia koñesimentu kona-ba desentralizasaun administrativa no eleisaun munisipál, hasa’e sira-nia partisipasaun polítika no lideransa iha eleisaun sira iha futuru. Atividade ida-ne'e, promove hosi Sekretaria Estadu ba Igualdade, konta ho kolaborasaun hosi Sekretariadu "Feto Prontu atu Lidera" no partisipasaun hosi membru sira hosi partidu polítiku oioin ho asentu parlamentár.
