Governu Timor-Leste

Ministériu Turismu Komersiu no Industria (MTKI) Ofisiálmente inagura grupu ho naran Laloran Korenti Tasi iha suku Batubou sub-distritu Maubara distritu Likisa foin lalais ne’e.

Diretór José Dias Quintas ne’ebé reprezenta Ministru, hato nia deskursu iha Seremonia ne’e katak, atu dezenvolve turizmu iha rai doben ida ne’e presiza timor-oan tomak nia kontribuisaun, Nia fiar katak Grupu Laloran Korenti Tasi iha Maubara sei bele fó sira nia kontribuisaun di’ak liu tan.

Diretur ne’e hatutan Grupu ida wainhira la’o ba oin ho di’ak, metin no servisu hamutuk nafatin, presiza iha komitmentu husi membru grupu ne’e nian, atu nune’e lor-loron bele hala’o servisu ho sustentabilidade.Governu prontu ajuda kualker aktividade ne’ebé komonidade sira inisia hodi kontribui dezenvolvimentu nasaun, tamba ne’e Diretur ne’e husu atu komonidade sira bo’ok a’an atu hamosu aktividade oi-oin ba Timor Leste nian diak.

Xefi Suco Batubou, Antonio Martins iha nia intervensaun rekoinese Grupu Laloran Korenti Tasi no grupu rua seluk, Grupu Haburas no Grupu Raimaran. Xefi Suco hateten, nia parte sei fó apoiu tomak ba grupu hotu ne’ebe ejiste iha nia Suco atu kontribui diak liu tan ba dezenvolvimentu nasaun.

Koordenador Grupu Laloran Korenti Tasi, Marcino Vidigal, iha oportunidade husu atu parte hotu fó suporta ba sira atu realiza mehi ne’ebé iha ba nasaun ne’e nia diak, liliu iha sub-distritu Maubara, fatin ne’ebé merese ba proteze atu atrai turista sira.

Partisipa iha serimonia inagurasaun ne’e, Diretur Nasional Peskas, Xefi Gabineti Ministeriu Agrikultura no Peskas, Diretur Fundasaun Haburas, Administrador sub-distritu Maubara, Autoridade lokal no komunidade Sucu Batubou.