Governu Promove Semináriu Sensibilizasaun kona-ba Desentralizasaun Servisu Sentru Nasionál Rehabilitasaun iha Munisípiu Baukau
Vise-Ministru Solidariedade Sosiál no Inkluzaun, Céu Brites, prezide, iha loron 10 fulan-outubru tinan 2024, iha abertura Semináriu Sensibilizasaun ba Desentralizasaun Servisu Sentru Nasionál Reabilitasaun (CNR, sigla iha lian portugés), ho tema: “Habelar Informasaun kona-ba Prestasaun Servisu CNR nian hodi Hadi’a Kualidade Moris Ema ho Defisiénsia”. Eventu ne’e hala’o iha Sentru Konvensaun Baukau no hetan partisipasaun husi reprezentantes autoridade lokál, liña setoriál no membru komunidade sira, ho objetivu atu fahe informasaun kona-ba servisu ne’ebé oferese husi CNR no diskute solusaun hodi hamenus difikuldade ne’ebé ema ho defisiénsia sira hasoru iha nivel lokál. 
Iha abertura semináriu nian, Vise-Ministra destaka importánsia atu desentraliza servisu Sentru Nasionál Reabilitasaun nian, hodi permite katak komunidade sira, liuliu iha áreas ne'ebé dook hosi kapitál, hetan asesu ba servisu reabilitasaun no apoiu, hodi prevene sidadaun sira atu labele muda mai Dili. Governante ne’e fó sai kona-ba planu hodi kria Sentru Reabilitasaun iha Munisípiu Baukau, no salienta katak, tuir sensu tinan 2022, munisípiu Baukau hanesan área ida iha nasaun ne’ebé presiza tebes servisu apoiu ba ema ho defisiénsia sira. Tanba ne’e, kriasaun Sentru Rehabilitasaun iha Baukau ne’e esensiál tebes hodi hakbesik servisu ba komunidade sira no hatán ba nesesidade lokál sira. Durante eventu ne’e entrega mós ekipamentu mobilidade ba utilizadór CNR sira. 
Xefe Suku Samalari, husi Postu Administrativu Baukau Vila, Rui Sertoriu Magno Sequeira, subliña importánsia husi semináriu ida-ne’e ba autoridade lokál sira, hodi haktuir katak inisiativa ne’e permite atu hetan informasaun kona-ba servisu CNR nian, ne’ebé sei transmite ba Xefe Aldeia sira no família husi ema ho defisiénsia. Fahe informasaun ne’e sei fasilita halibur dadus kona-ba nesesidade lokál no asesu ba servisu no apoiu sira ne’ebé Governu fornese.
Ho semináriu ida-ne’e no anúnsiu kriasaun Sentru Reabilitasaun ida iha Munisípiu Baukau, Governu, liuhosi Ministériu Solidariedade Sosiál no Inkluzaun, reafirma ninia kompromisu atu garante katak sidadaun sira ne’ebé vulneravel liu hetan kuidadu no apoiu nesesáriu ba moris ida ne’ebé dignu no inkluzivu liu.
