Primeiru-Ministru Hasoru malu ho Komunidade Timoroan iha Portugal durante Vizita ba UCCLA
Iha loron 13 fulan-outubru tinan 2024, Primeiru-Ministru, Kay Rala Xanana Gusmão, hala’o enkontru ida ho komunidade timoroan ne’ebé hela iha Portugál, durante ninia vizita ba Uniaun Sidade Kapitál Lian Portugés (UCCLA, acrónimu Portugés), iha Lizboa. Auditóriu UCCLA nian nakonu ho timoroan sira ne’ebé estuda no servisu iha Portugál, hodi rona Xefe Governu no fahe sira-nia esperiénsia no preokupasaun sira. 
Iha ninia diskursu, Xanana Gusmão halo fali trajetória ida kona-ba perkursu istórika Timor-Leste nian, hodi hanoin hikas fali dezafiu barak ne’ebé hasoru iha prosesu tomak independénsia no konstrusaun Estadu no Nasaun nian. “Ita hasoru dezafiu barak”, nia subliña hodi hanoin hikas fali sofrimentu no lakon sira ne’ebé marka ona povu timoroan iha tinan hirak nia-laran. Primeiru-Ministru destaka mós reziliénsia timoroan sira-nian no reforsa importánsia hosi sira ne’ebé hela iha rai-li’ur hodi hetan koñesimentu no abilidade barak liután, atu nune’e bele kontribui maka’as ba dezenvolvimentu Timor-Leste nian bainhira sira fila. 
Enkontru ne’e fó dalan ba komunidade timoroan iha Portugál atu hato’o sira-nia preokupasaun diretamente ba reprezentantes Governu. Ministru Negósiu Estranjeiru no Koperasaun, Bendito dos Santos Freitas, informa mós katak, halo hela esforsu diplomátiku hodi rezolve kestaun sira relasionadu ho movimentu timoroan sira nian iha Portugál, liuliu iha aeroportu, iha prosesu diálogu ida ho autoridades portugeza.
Sorumutu ida ne’e nu’udar momentu ida ne’ebé iha unidade boot entre ofisiál governu no komunidade timoroan. Hafoin diálogu, ema barak ne’ebé marka prezensa aproveita hodi hasai fotografia hamutuk ho Primeiru-Ministru no delegasaun ofisiál, hodi marka okaziaun ne’e nu’udar símbolu besik malu entre Timor-Leste ho ninia sidadaun sira ne’ebé hela iha estranjeiru. 
Molok enkontru ho komunidade timoroan, Primeiru-Ministru hasoru malu ho Sekretáriu Jerál UCCLA, Vitor Ramalho, ho kolaboradór sira seluk hosi instituisaun ne’e, iha sesaun ida iha ne’ebé diskute kona-ba projetu sira ne’ebé implementa ona hosi UCCLA iha Timor-Leste no sira seluk ne’ebé sei la’o hela. Vizita ne’e marka ho inaugurasaun plaka ida, ne’ebé lokaliza iha sala reuniaun instituisaun nian.
Delegasaun ofisiál ne’ebé akompaña Primeiru-Ministru, inklui membrus Governu, reprezentantes korpu diplomátiku no dirijente instituisaun nasionál sira. 
